شرۆڤه‌كاره‌كێ سیاسی:پشكداریا حوكمه‌تا هه‌رێمێ د كوڕبه‌ندێ داڤۆسێ دا گرنگیا پێگه‌هێ كوردان نیشان د ده‌ت
هه‌ولێر، سولین سلێمان
چاڤدێره‌كێ سیاسی د دیداره‌كێ دا بۆ ڕۆژنامه‌یا (ئه‌ڤرۆ) ڕادگه‌هینیت ، پشكداریا حوكمه‌تا هه‌رێما كوردستانێ د كوڕبه‌ندێ داڤوسێ دا گرنگیه‌كا مه‌زن ژبۆ پێگه‌هێ كوردان هه‌یه و ڕامانا وێ چه‌ندێ دده‌ت كوردستانێ پێگه‌هه‌كێ گرنگ و تایبه‌ت یێ هه‌ی.
به‌درخان زاویته‌یی شروڤه‌كارێ سیاسی گوت” ئه‌ف كوڕبه‌نده د ده‌مه‌كی دایه جیهان د چه‌ند قه‌یرانێن دژوار دا ده‌رباز دبیت ئه‌وژی شه‌ڕێ ڕوسیا و ئوكراینا و ڤه‌رێژا نه‌خوه‌شیا كورۆنایێ كو جیهان تووشی فالنجیبوونه‌كا تمام كربوو وهه‌تا نوكه ژی شوونوارێن وێ د به‌رده‌وامن زێده‌باری قه‌یرانا وزێ ل جیهانێ كو هه‌موو گرێدای ئابووریا وه‌لاتانه د ڕه‌وشه‌كا ب ڤی ڕه‌نگیدا گرێدانا ڤی كوڕبه‌ندی گرنگیه‌كا تمام جودا یاهه‌ی ژ سالێن ده‌رباز بووی، چونكه وه‌لاتێن پشكدار تایبه‌ت وه‌لاتێن زلهێز ل چاره‌سه‌ریا دگه‌ریێن بۆ ڤان قه‌یرانانێن كو جیهان تووش بویێ و كێشه‌یێن مه‌زن دروستكرینه”.
خویاكر”پشكداریا سه‌رۆكێ حوكمه‌تا هه‌رێما كوردستانێ د ڤی كوڕبه‌ندێدا و دڤێ ڕه‌وشا هه‌ستیاردا و كۆمبونێن ل گه‌ل سه‌ركرده‌یێن وه‌لاتێن جیهانێ ئه‌نجامداین گرنگیه‌كا تایبه‌ت و مه‌زن هه‌یه بۆ پێگه‌هێ هه‌رێمێ تایبه‌ت هه‌كه بزانین نوكه هه‌رێما كوردستانێ جهه‌كێ گرنگ هه‌یه ل سه‌ر نه‌خشه‌یێ وزا جیهانی و جهه‌كێ ئارامه بۆ وه‌به‌رئێنانێ”.
ئاماژه‌كر”پشكداریا هه‌رێما كوردستانێ دڤان جۆره روودانێن گرنگ دا چ ل سه‌ر ئاستێ سه‌روكاتیا حوكمه‌تێ یان سه‌رۆكاتیا هه‌رێمێ نیشانا وێ چه‌ندێ یه كو هه‌رێمێ پێگه‌هه‌كێ گرنگ و تایبه‌ت هه‌یه و نامێن بهێزن بو وان ئالی و وه‌لاتان یێن به‌رده‌وام بزاڤان بارودوخێ هه‌رێمێ تێكدانا ڕه‌وشا هه‌رێما كوردستانێ دكه‌ن”.
