پەیڤدارێ حوكمەتا هەرێمێ: دانوستاندن ل گەل بەغدا دێ د بەردەوام بن

ئەڤرۆ

شاندێ حوكمەتا هەرێما كوردستانێ، د سەرەدانا خوە یا ڤێ دووماهیێ دا بۆ بەغدا، سەبارەت هندەك بابەتێن پەیوەندیدار ب قانوونا پەترۆل و غازێ ل گەل وەزیرێ پەترۆلا ئیراقێ كۆمبوو.
جوتیار عادل، پەیڤدارێ حوكمەتا هەرێما كوردستانێ و ئەندامێ شاندێ دانوستاندكار، گوت» حوكمەتا هەرێما كوردستانێ ل سەر بنەمایێ ڕێككەفتنا سیاسی یا پێكئینانا حوكمەتا محەمەد شیاع سودانی، بۆ داڕێشتن و بەرهەڤكرنا قانوونا بودجەیا 2023 و قانوونا پەترۆل و غازێ و چەندین بابەتێن پەیوەندیدار سەرەدانا بەغدا كر و د كۆمبوونا ل گەل حەیان عەبدولغەنی، وەزیرێ پەترۆلا ئیراقێ، ب شێوەیەكی گشتی ل سەر كۆمەكا بابەتێن پەیوەندیدار ب قانوونا پەترۆل و غازێ دانوستاندن هاتە كرن و دانوستاندن ژی د د بەردەوام بن».
پەیڤدارێ حوكمەتا هەرێما كوردستانێ ب ئاماژەدان ب پێداگیریا حوكمەتا هەرێمێ بۆ ڕێككەفتنێ ل گەل بەغدا، گوت» شاندێ حوكمەتا هەرێما كوردستانێ بۆ باسكرنا پرسا پرۆژەیێ قانوونا بودجەیا فیدرال ل گەل تیما حوكمەتا ئیراقێ كۆمبوو و بڕیارە تیمەكا قانوونی بۆ تمامكرنا داڕێشتنا دەقێن قانوونی یێن تایبەت ب پرۆژەیێ قانوونا بودجەی و قانوونا پەترۆل و غازێ، د دەمێ دو ڕۆژێن بهێت دا سەرەدانا بەغدا بكەت» .
ل دۆر دۆسێیا قانوونا پەترۆل و غازێ، پەیڤدارێ حوكمەتا هەرێما كوردستانێ ئاماژە كر» تێكگەهشتنەك ل سەر بنەمایێن گشتی هەیە، بەلێ پێدڤی ب دانوستاندن و كۆمبوونێن زێدەتر هەیە و لژنەیا هەڤپشك ل چەند ڕۆژێن داهاتی، بۆ كارپێكرنێ ب وێ تێكگەهشتنا هەردو ئالی ل سەر ڕێككەفتین، دێ دەستبكار بیت».
زێدەتر گوت» قانوونا پەترۆل و ازێ بۆ هەموو ئیراقێ یا گرنگ و پێدڤیە، چونكە سێكتەرێ پەترۆلێ ل ئیراقێ گرفتێن زۆر یێن هەین و قانوون ژی بۆ نینە، ئەڤ سێكتەرە نوكە ب گۆرەی قانوونا وەزارەتا پەترۆلێ كار دكەت كو ل سالا 1976 هاتیە داڕێشتن. لەوما قانوونا پەترۆل و غازێ تنێ بۆ چارەسەركرنا كێشەیا د ناڤبەرا بەغدا و هەولێرێ دا نینە، بەلكو كێشەیا هەموو ئیراقێ دێ چارەسەركەت و پێداچوون ژی ب سێكتەرێ پەترۆلا ئیراقێ دا دكەت».
شاندێ حوكمەتا هەرێما كوردستانێ هەر د وێ سەرەدانێ دا بۆ بەغدا، ل گەل ئەلینا رۆمانسكی، بالیۆزا ئەمریكا ل ئیراقێ كۆمبوو و پێداگیری ل سەر پێدڤیا چارەسەركرنا كێشەیێن د ناڤبەرا هەردو حوكمەتێن هەرێما كوردستانێ و ئیراقێ ل سەر بنەمایێ دەستووری و بەردەوامبوونا دانوستاندنان بۆ ڤێ مەبەستێ كر.
هەروەسا شاندێ حوكمەتا هەرێما كوردستانێ ل گەل عەتوان ئەلعەتوانی، سەرۆكێ لژنەیا دارایی ل جڤاتا نوونەرێن ئیراقێ كۆمبوو و باس ل پێنگاڤێن داهاتی یێن پەسەندكرنا بودجەی، ب هەماهەنگی ل گەل هەردو ئالیێن پەیوەندیدار كر.
ژ ئالیەكێ دا ڤە ئەلینا رۆمانسكی بالیۆزا ئەمریكا ل ئیراقێ سەرەدانا ڤێ دووماهیێ یا شاندێ حوكمەتا هەرێما كوردستانێ بۆ بەغدا ب سەركەفتی هەژمارت و دبێژیت، چارەسەركرنا كێشەیێن هەلاویستی دناڤبەرا هەردو ئالیان دا خزمەتا بەرژەوەندیێن نیشتمانی یێن ئیراقێ دكەت و كار دكەت بۆ سەربخوەكرنا كەرتێ وزێ و پاراستنا سەقامگیریا دەڤەرێ.
ئەڤە دوەمین سەرەدانا شاندێ هەرێما كوردستانێ یە بۆ بەغدا د ڤێ هەیڤێ دا. هەمان شاند ل ڕۆژا 11/2/2023 سەرەدانا بەغدا كربوو و چەند كۆمبوون ل گەل بەرپرسێن حوكمەتا ئیراقێ ئەنجامدابوون.
ب گۆرەی كارنامەیا حوكمەتا محەمەد شیاع سودانی، سەرۆك وەزیرێن ئیراقێ پێدڤی بوو ل دەستپێكا سالا 2023 ڕێككەفتن د ناڤبەرا بەغدا و هەولێرێ دا ل دۆر بودجەی هاتبا كرن، بەلێ بڕیارا دادگەها فیدرالی یا بلند ل ئیراقێ دژی هنارتنا پارەی بۆ هەرێما كوردستانێ، ب ئێك ژ ئاستەنگێن قانوونی ل بەردەم ڕێككەفتنێ د وی بواری دا دهێتە هەژمارتن، كو پێدڤی ب چارەسەریێ یە.

کۆمێنتا تە