ژ (رەشكۆ)ی بۆ (شوكرۆیا عەزێ) دگەل عەبدولرەحمان بامەرنی
شاكر ئەتروشی
رەشكۆ ناڤێ رۆمانا وی یا ئێكەمین بوو، پار سال كەتیە بەردەستێ خواندەڤانا و ئەڤ سالە ژی ب ناڤێ (شوكرۆیا عەزێ) كۆمەلا خوە یا ئێكێ یا كورتە چیرۆكان دەرئێخست. تشتێ بۆ من بالكێش ژڤان هەردو پەرتووكان، ناڤ و نیشانێن وانن، هەردو ناڤێن مرۆڤانن، هەردو ناڤ ژی ناڤێن كوردینە، خوە ئەگەر ژ بنەما ئەو ناڤ عەرەبی ژی بن، وەك رەشكۆی كو د خوەبخوەدا ناڤێ كەسەكی یە د رۆمانێ دا كو ناڤێ وی رەشید بوو و ژبەركو خەلكی نەقل ناڤ ل سەر كربوون و ب رەشكۆی گازی دكەنێ و هوسان بۆ وی ژی رەشكۆ ژ رەشیدی خوشترە. د پەرتووكا دوویێ ژی دا (شوكرۆیا عەزێ) ئەو ژی ناڤەكێ عەرەبی یە و یا دروست رەنگە هوسا بیت، شوكرۆیا عەزیزایێ و ئەڤە ژی ناڤەكێ عەرەبی یە، لێ هەم ناڤێ چیرۆكەكێ یە دناڤ ڤێ كومەلێ دا دیسان ناڤێ پەرتووكێ ژی پێ ناڤكریە!
لڤێرە پرسیار ئەڤەیە، ئایا ناڤ قەلیا بوون هەروەكو ئەم ب كوردی و كوردەواری دبێژین، كو بامەرنی چ ناڤێن دی ب دەست نەكەفتین ل پەرتووكێ خوە دانیت یان ژی وی ئەنقەست ئەڤ ناڤە هەلبژارتینە و مەبەستەك پێهەیە؟! رەنگە بەرسڤا ڤان هەردو ناڤ ئینانان د هەردو پەرتووكان دا بكەڤنە بەرچاڤ، لێ هەر چاوا بیت ناڤ گرنگە بۆ دانانا پەرتووكێ و ئێكەم تشتێ سەرنا خواندەڤای رادكێشیت ژی ناڤێ پەرتووكێ یە، دەما ئەو سەرەدانا پەرتووكخانێ دكەت و پاشی ناڤێ نڤیسەری و خالا سیێ ژی، رەنگە ل دویڤ ناڤ و دەنگییا پەرتووكەكا تایبەت بیت، كو پێش وەخت كەسەك مرۆڤی ب خواندنا وێ شیرەت بكەت.
بۆ زانین پەرتووكا (شوكرۆیا عەزێ) ژ (22) كورتەچیرۆكان پێك دهێت، ئەو ژی هەر ئێك ژ چیرۆكا: (نڤیسەر، تابووت، تابلۆ، دایكینی، زەنگا تەلەفونێ، قوزلقورت، سمینارا سەیدای، مایتێكرن، دەرگەهـ، فەیسبۆكە تابلۆ، ئێكە و نابیتە دو، قاتێ پێنجێ ژوورا ژمارە دو، كەشتییا مرنێ!، فرین د وەرزێ پایزێ دا، تكێتا شەمەندەفرێ، شۆكرۆیا عەزێ، ڤالێنسیا، دفن بلندی، جڤاتا مشكان، جێری، خرەخر، ژڤان). دڤان كورتە چیرۆكان ژی دا تشتێ بالكێش، یاریكرنێن نڤیسەری ب روودان و پێشهاتانە، تەكنیكێن وی یێن جودا و جیاواز، زمانێ وی یێ نڤیسینێ یێ سادە و سڤك و رەهوان و ئەز باوەرم خواندنێن جوان و دەمێن خوەش دگەل خواندنا وان دێ دەرباس بن، هەر چ نەبیت ئەز بەحسا خوە دكەم كو من خواندین.
