مەسرور بارزانی: پێكڤەژیان و هەڤدو قەبوولكرن بوویە پشكەك ژ كەلتوور و ژیانا مە
سەرۆكێ حوكمەتا هەرێما كوردستانێ، مەسرور بارزانی ل كۆنفرانسێ كوردستان لاندكا پێكڤەژیانا ئاشتیانە ل هەولێرێ، گۆتارەك پێشكێشكر و تێدا ڕاگەهاند: پێكڤەژیان و هەڤدوو قەبوولكرن بوویە پشكەك ژ كەلتوور و ژیانا مە.
دەقێ گۆتارا سەرۆكێ حوكمەتا هەرێما كوردستانێ..
سوپاسیا بەرهەڤبوونا هەوە هەموویان دكەم، سوپاسیا یەرهەڤبوونا مامۆستایێن ئایینی ژ هەموو ئایین و ئایینزایێن جودا یێن كوردستانێ دكەم كو هاتین و ل ڤێرێ دگەل مەدانە، هەروەسا سوپاسیا بەرهەڤبوونا مامۆستایێن بەرێز یێن زانكۆیان دكەم.
مە پێدڤی ب ڕێنما و بۆچوونێن هەوە هەیە. هەروەكو چاوان هەوە شیایە هەتا نوكە ب ڕێنمایێن خوە، كوردستانێ وەكو لاندكا ئاشتیێ و پێكڤەژیانێ بپارێزن، هیڤیدارم ب هەمان شێوە، نەڤیێن مە یێن داهاتی ژی ب ڤی شێوەی پەروەردە بكەن.
دەستخوەشیێ ل ڕێكخەرێن ڤی كۆنفرانسێ وەزارەتا ئەوقافێ و كاروبارێن ئایینی دكەم بۆ ڕێكخستنا ڤی كۆنفرانسی ب ڤێ هەلكەفتێ كو ڕۆژا نێڤدەولەتی یا بەرهنگاریبوونا گۆتارا كەربێ یە.
د دیرۆكا مرۆڤایەتیێ دا و هەتا ئەڤرۆ ژی گۆتار و درووشمێن دوژمنكارانە و هاندانا توندوتیژیێ، كارەساتێن مەزن پەیداكرینە. د ڤی سەردەمی ژی دا كو سەردەمێ پێشكەفتن و تەكنۆلۆژیایێ یە، هێشتا ئەو جۆرە گۆتار جهێ دلتەنگیێ نە و ئەنجامێن وێ ژی گەلەك د بەرچاڤن و دبینین كو ل گەلەك وەلات و دەڤەرێن جودا یێن جیهانێ شەر و خوینڕشتن بەردەوامە.
هەروەكو ل درووشمێ ڤێ هەلكەفتێ ژی دا هاتی، كوردستان بەردەوام لاندكا پێكڤەژیانا ئاشتیانە بوو، چەندین هزار سالە كو ئەڤ دەڤەرا مە، نەتەوە و ئایین و باوەریێن جودا جودا ب خوەڤە گرتیە و پێكڤەژیان و هەڤدوو قەبوولكرن بوویە پشكەك ژ كەلتوور و ڕێكا ژیانا مە. ل پتریا دەڤەرێن كوردستانێ كورد و توركمان و كلدان و ئاشووری و سریان و ئەرمەن و ئەرەب و موسلمان و مەسیحی و ئێزدی و جوهی، پێكڤە ژیاینە و ل ڕۆژێن تەنگاڤیاندا هاریكارێن هەڤدوو بووینە.ئەز خەلكێ دەڤەرەكێ مە كو مزگەفت و كەنیسە و كنیشت د ئێك گوند دا هەبوون. بەردەوام شانازیێ ب وی كەلتووری دكەم و هەموو شیانێن خوە دێ بكارئینم بۆ مان و پێشڤەبرنا ڤی كەلتوورێ جوان.
هەرچەندە هەرێما كوردستانێ ئەو ناڤەند و لاندك بوو كو هەموو نەتەوە و ئایین و ئایینزایەكی تێدا هەست ب ئارامیێ و ئاسوودەیێ كریە، بەلێ مخابن بەردەوام ئەو جهێ ئارام، كەفتیە بەر هێرشا هزرا دوژمنكارانە، بەردەوام بزاڤ هاتیە كرن ئەڤ كەلتوورێ پێكڤەژیانا هەرێمێ بهێتە شێواندن و هەتاكو بزاڤا نەهێلان و جینۆسایدا نەتەوە و ئایینێن دناڤ كوردستانێ دا هاتیە كرن.
دیرۆكا نوو یا نیشتمانێ مە، وێ چەندێ دیار دكەت كو ژ ئەگەرێ هزرا شۆڤینی و دوژمنكارانە و حاشاییكرن ل بوونا نەتەوەیێ مە، وەلاتێ مە تووشی چەندین كارەسات و كۆمەلگوژی مەزن بوویە. وێرانكرن و سوتن و ئەنفال و كیمیابارانكرن، دەرئەنجامێ زالبوونا وێ هزر و عەقلیەتێ بوو كو یەكسانی و دادپەروەری و دانپێدان ب مافێ نەتەوەیێن دی نەدكر.
ئەڤرۆ گەلەك ژ وان كەس و ئالیێن هێرشی مە دكر نەماینە، بەلێ ئەم هەر یێن ماین، ئەڤە ژی بێگومان ژ ئەگەرێ پاراستنا وی كەلتوور و هزرا پێكڤەژیانێ یە. هەموو ئالیەك دزانن كو ل سەردەمێ شۆڕەشا ئەیلوولێ دا، سەرەرای وان هەموو كوشتارێن ل وەلاتیێن مە د هاتە كرن، بارزانیێ نەمر بەردەوام دووپاتی ل وێ چەندێ دكر كو ئەم ڕێكێ نادەین ئەو شەڕە ببیتە شەڕێ د ناڤبەرا كورد و ئەرەبا دا، بەلكو بەردەوام دگوت كو شەڕێ مە ل گەل دەستهەلاتدارێن زۆردارە نەكو نەتەوەیان. ل دەمێ سەرهلدانێ ژی كو تنێ سێ سال ب سەر ئەنفال و كیمیابارانێ دا دەرباز ببوو، ب هزاران سەربازێن ئیراقی ل هەرێما كوردستانێ وەكو دیل هاتنە دەستەسەركرن، بەلێ سەرۆك بارزانی داخوازكر ڕێز لێ بهێتە گرتن و بهێنە پاراستن.
ئەم بەردەوام ڤی كەلتوورێ جوان دپارێزین و گۆتارا مە دێ گۆتارا خوەشتڤیێ و پێكڤەژیانا ئاشتیانە و ڕێزگرتنا بەرامبەر و یەكسانی و دادپەروەری بیت. ئەم ڕێكێ نادەین هیچ هزرەكا كەربێ و توندوتیژیێ بهێتە دناڤ هەرێما كوردستانێ دا.
بەلێ مخابن كو دبینین وانە ژ دیرۆكێ نەهاتیە وەرگرتن و دیسان هندەك كەس بزاڤا بەلاڤكرنا هزرا شۆڤینی و خوەسەپاندنێ دكەن.
مە بۆ دامەزراندنا ئیراقەكا فیدرالی و دیموكرات، گەلەك داگیران كر، مە ب هەموو شیانێن خوە بزاڤكر ئیراقەكا نوو بهێتە ئاڤاكرن كو تێدا هەموو پێكهاتە هەست ب هەبوونا خوە و پاراستنا ماف و تایبەتمەندیێن خوە بكەن، بەلێ د بەرامبەر دا دبینین كو هێدی هێدی ئەو پڕۆسەیە یا ژ ڕێكا خوە لاددەت و نێزیكە ئیراق ب ئاراستەیەكی دهێتە برن كو تووشی ئەزموونێن تەحل یێن بۆری ببیت.
دبینین بزاڤا پێشێلكرنا مافێن مە یێن دستووری دهێتە كرن، دبینین گۆتارا كەرب و دوژمنكارانە بەرامبەر هەرێما كوردستانێ دهێتە بەلاڤكرن و ب شێوازەكێ چەواشەكارانە دهێنە بەلاڤكرن كو پێشكەفتن و ئاڤەدانكرنا هەرێما كوردستانێ ل سەر كیستێ دەڤەرێن دی یێن ئیراقێ یە و ب وی جۆری دخوازن خراب بڕێڤەبرن و هەدەردانا سامانێ گشتی و گەندەلیێن خوە ڤەشێرن.
د وان سالێن كو شەڕەكێ تایفی ل گەل دەڤەرێن ئیراقێ هەبوو، هەرێما كوردستانێ ببوو پەناگەهەك بۆ هەموو ئالیەكی. هەموو ئەو تایفێن ل دەڤەرێن دی یێن ئیراقێ هەڤدوو د كوشت، ل هەرێما كوردستانێ دبوونە جیرانێن هەڤدوو. ل سەردەمێ شەڕێ دژی تیرۆرستێن داعشێ ژی، ب سەدان هزار خەلكێ دەڤەرێن دی یێن ئیراقێ هاتنە هەرێمێ و هەتا نوكە ژی پتریا وان د بەرهەڤ نینن كەمپان چۆل بكەن و بزڤرنە جهێن خوە، چونكە هێشتا هەست ب مەترسیێ دكەن.
ئەم شانازیێ ب وێ چەندێ دكەین كو كەلتوورەكێ وەسا مە هەیە و پێدڤیە ئەم هەموو بزاڤێ بكەین هزر و گیانێ پێكڤەژیانێ پێشڤە ببەین. داخوازیا مە ژی ژ خەلك و بەرپرسێن دلسۆزێن دەڤەرێن دی یێن ئیراقێ یە، كو ڕێكێ ل بەلاڤكرنا هزرا توندوتیژیێ بگرن و پەندێ ژ دیرۆكا خویناوی یا ئیراقێ وەربگرن. بلا ئەم هەموو پێكڤە كار بكەین بۆ چەسپاندنا ئاشتیێ و تەبایێ و شیانێن خوە بكاربینین كو نە تنێ ل هەرێمێ و ئیراقێ، بەلكو ل هەموو دەڤەرێ و جیهانێ ژی ببینە فاكتەرێ چەسپاندنا ئاشتیێ و نەهێلانا شەڕی و خوینڕشتنێ.
ل دووماهیێ پێدڤیە دوپاتیێ ل وێ چەندێ بكەین كو پێگیری بوون ب دستوورێ ئیراقێ، تاكە گەرنتیا سەقامگیری و پاراستنا مافێن هەموو پێكهاتەیێن ئیراقێ یە، كوردستان و هەموو پێكهاتەیێن وێ، تووشی چەندین بزاڤێن ژناڤبرنێ بووینە وەكو ئەنفال و كیمیابارانكرن و داگیركرنا ئەردی و ڤەگوهاستن و نەهێلانا ناسنامەیا نەتەوەیی، لەوما ب گۆرەی دستووری داخوازا قەرەبوویا وان هەموو ستەما ل مە هاتیە كرن دكەین .
كێشەیا مە تنێ كێشەیا مووچەی و بابەتێ دارایی نینە، نوكە پتریا مافێن دستووری یێن مە هاتینە پشتگوه هاڤێتن و پێشێلكرن، نموونەیا هەرە دیار ژی ئەوە كو هەتا نوكە ل كەركووكێ و دەوروبەرێن وێ، جوتیارێن كورد و توركمان گەف یێن ل سەر هەین و ئەردێن وان دهێنە داگیركرن، لێ دخوازن هەموو مافێن مە، د بابەتێ دارایی و مووچەی دا بچووك بكەن و ئەڤجا ڤی بابەتی ژی دژی مە بكاربینن.
داخوازیا من ژ دەستهەلاتێن بەغدا ئەوە كو ڕێزێ ل دستووری بگرن و وانێ ژ دیرۆكێ وەرگرن، ئەوا ب ئاشتیێ و سەقامگیریێ دشیێن بدەستڤەبینین، ب شەڕی و ستەمێ و خوەسەپاندنێ بدەستڤەناهێت.
داخوازیا من ژ وەلاتیێن خوەشتڤیێن كوردستانێ و ئالیێن سیاسی یێن هەرێمێ ژی ئەوە كو خەبات و قوربانیدانا گەلێ مە ژبیر نەكەن و بهایێن خوە یێ بلند ل بن هیچ فشارەكێ و بۆ بەرژەوەندیا بەرتەنگ ژ دەست نەدەن و بەردەوام بن بۆ پێشڤەبرنا وی كەلتووری و ڕێزگرتنێ ل وان بهایێن پیرۆز یێن مە هەین ژ پێخەمەت نیشتمانەكێ ب هێز.
