پەرلەمانتارەك: ئێدی 30 ڕۆژان جارەكێ دێ مووچەیێ فەرمانبەرێن كوردستانێ هێتە بەلاڤكرن
ئەندامەكێ جڤاتا نوونەرێن ئیراقێ ڕادگەهینیت: ل هەفتیا بهێت هەردو وەزارەتێن دارایی و پلاندانانێ ل ئیراقێ دێ ڕێنمایێن تایبەت ب قانوونا بودجەی دەركەن و دێ ئەو قانوون كەڤیتە د بوارێ بجهئینانێ دا. دیاركر ژی كو مووچەیێ مەها خزیرانا 2023 یێ فەرمانبەرێن هەرێما كوردستانێ ژی ب گۆرەی قانوونا بودجەیا ئیراقێ دێ هێتە بەلاڤكرن، هەروەسا دبێژیت: مووچەخۆرێن هەرێما كوردستانێ ئێدی كێشەیا مووچەی نامینیت و پێدڤیە 30 ڕۆژان جارەكێ مووچەیێن وان بهێنە بەلاڤكرن.
د. بڕیار ڕەشید، ئەندامێ جڤاتا نوونەرێن ئیراقێ و ئەندامێ لژنەیا دارایی ل جڤاتا ناڤبری گوت» پشتی ئیمزاكرنا قانوونا بودجەیا ئیراقێ ژ ئالیێ سەرۆك كۆماری ڤە، چاڤەڕێ دهێتە كرن ڕێنمایێن وەزارەتێن دارایی و پلاندانانێ بۆ بهێنە دەركرن بۆ وێ چەندێ بكەڤیتە دوارێ بجهئینانێ دا، ئەوژی ل هەفتیا بهێت دێ تمام بیت».
سەبارەت مووچەیێ فەرمانبەرێن هەرێما كوردستانێ، د. بڕیاری گوت «ئەم دێ چاڤدێریا بجهئینانا قانوونا بودجەیا ئیراقێ كەین، ئەو پارێ حوكمەتا ئیراقێ مەهانە بۆ هەرێما كوردستانێ دهنێریت دڤێت ل بەراهیێ بۆ مووچەیێ فەرمانبەران بیت و پێدڤیە هەر 30 ڕۆژان جارەكێ مووچەیێ مووچەخۆر و فەرمانبەران بهێتە بەلاڤكرن».
سەبارەت وەكهەڤكرنا ژڤانێ بەلاڤكرنا مووچەیێ فەرمانبەرێن هەرێما كوردستانێ و دەڤەرێن دی یێن ئیراقێ، وی پەرلەمانتاری گوت» حوكمەتا هەرێما كوردستانێ دێ ژڤانێ خوە بۆ بەلاڤكرنا مووچەی هەبیت، بەلێ گرنگ ئەوە نەهێتە گیرۆكرن و نابیت خاڤی تێدا بهێتە كرن، چونكە هیچ كێشەیەك بۆ مووچەی نەمایە و پێدڤیە مەهانە بهێتە بەلاڤكرن».
پشتی سالا 2014 كێشە بۆ بودجەیا هەرێما كوردستانێ دروست بوویە ژ ئەگەرێ بڕینا بودجەی ژ ئالیێ بەغدا ڤە و هەروەسا شەڕێ داعشێ و قەیرانا دارایی، دەمێ 9 سالیە هەرێما كوردستانێ بێی قانوونا بودجەیە و كێشەیا مووچەیێ فەرمانبەران ژی یا بەردەوامە، چاڤەڕێ دهێتە كرن ئێدی ئەو كێشەیە نەمینیت.
ب گۆرەی قانوونا بودجەیا گشتی یا ئیراقێ، پشكا هەرێما كوردستانێ نێزیكی 16 ترلیۆن دینارایە، ئەو پارێ بۆ مووچەیێ فەرمانبەرێن هەرێمێ هاتیە تەرخانكرن 9 ترلیۆن و 299 ملیار دینار و 513 ملیۆن دینارن. ب بەلاڤكرنا وی گۆژمێ پارەی ب سەر مەهێن سالێ دا دێ دیاربیت ئەو پارێ بۆ مووچەیێ فەرمانبەران د هەر مەهەكێ دا دهێتە تەرخانكرن 774 ملیار و 959 ملیۆن دینارن .
