ڕێگریكـرن ل زڤـڕینا پارتـی بۆ كـەركـووكێ بەلگەیە ل سـەر بجهـنەئیـنانا مـادەیا 140
پەرلەمانتارەك ئاماژێ ب وێ چەندێ دكەت، مادەیا 140 ب وی شێوەیێ نوكە كار ل سەر بهێتە كرن، دێ بێ ئەنجام بیت و ڕێگریكرن ل زڤرینا پارتی دیموكراتی كوردستان بۆ كەركووكێ و شنگالێ و جهێن دی بەلگەیە ل سەر بجهنەئینانا مادەیا 140، هەروەسا دبێژیت، حوكمەتا محەمەد شیاع سۆدانی هەڤشێوەیا حوكمەتا كازمی بڕیاران ددەت بەلێ بجه نائینیت.
ماجد شنگالی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان سەبارەت ڕێگری و ئاستەنگێن بەردەم بجهئینانا مادەیێ 140 یێ دستووری گوت» ئالیێن سیاسی یێن ئیراقی پشتی پەسەندكرنا دستووری ل سالا 2005 و هەتا گەهشتیە نوكە، هیچ بڕگە و مادەیەكا دستووری وەكو خوە بجهنەئینایە، سەبارەت مادەیا 140، تنێ گۆژمێ10 ملیۆن دینار وەكو قەرەبوو بۆ زیانداران هاتیە مەزاختن، ئەگەر نە هەتا نوكە سەبارەت ئاساییكرنا دەڤەرێن سنوورێ مادەیێ 140، نە سەرژمێری هاتیە كرن و نە ڕاپرسی ژی هاتیە ئەنجامدان».
گوت ژی» پتریا ئالیێن سیاسی یێن ئیراقی دژی بجهئینانا مادەیا 140 نە، بەلێ ب زمانی ب ئاشكرا نابێژن، بەلكو د ناڤخوەدا ب تمامی دژی بجهئینانا وێ مادەیێ نە».
ماجد شنگالێ ئاشكراكر ژی» ڕێگریكرن ل زڤرینا پارتی دیموكراتی كوردستان بۆ كەركووكێ و شنگالێ و جهێن دی، بەلگەیە ل سەر وێ چەندێ كو ڕێ ناهێتە دان مادەیا 140 بهێتە بجهئینان».
هەڤدەم باس ل وێ چەندێ كر» وان ئالیێن سیاسی ترس ژ پارتی دیموكراتی كوردستان هەیە بزڤریتە كەركووكێ و جهێن دی، لەوما هەتا د شیانێن واندا بیت ڕێگریێ ل زڤرینا پارتی بكەن بۆ كەركووكێ، حوكمەتا محەمەد شیاع سۆدانی ژی هەڤشێوەیێ حوكمەتا مستەفا كازمی یە، بڕیاران ددەت، بەلێ بجهنائینیت».
سەبارەت هەلویستێ پارتی ل سەر وان جۆرە هەلویستان، ماجد شنگالی دبێژیت» پارتی ب هەموو شێوەیان دەستپێشخەریێ دكەت بۆ بجهئینانا ڕێككەفتنان ل گەل هەڤپەیمانیا بڕێڤەبرنا دەولەتێ، بەلێ حوكمەتا ئیراقێ و هەڤپەیمانیا بڕێڤەبرنا دەولەتێ ل بەرامبەر وان دەستپێشخەریان یا بێ دەنگە و خوە ژێ ڤە ددزریت» هەروەسا دوپاتكر ژی» بجهئینانا مادەیا 140 ب وی شێوەیێ نوكە، دێ بێ ئەنجام بیت».
بەری چەند ڕۆژان لایەنگرێن حەشدا شەعبی و عەسائیب ئەهلولحەق خوەنیشادان ئەنجامدابوو دژی بڕیارەكا محەمەد شیاع سۆدانی، سەرۆك وەزیرێن ئیراقێبۆ ڕادەستكرنا بارەگەهێ جڤاتا سەركردایەتیا پارتی ل كەركووكێ كو پشتی ڕوودانێن 16 ئۆكتۆبەرا 2017 فەرماندەیا ئۆپەراسیۆنێن كەركووكێ تێدابوو و ڕێكا هاتنوچوونێ د ناڤبەرا كەركووكێ و هەولێرێ دائێخستبوو و ئاستەنگ بۆ هاتنوچوونا شۆفێران ژی دروستكربوو.
