دهۆك بۆ ئاشتكرنا جەماوەرێ خوە و زاخۆ چاڤ ل سەركەفتنێ یە
قەیس وەیس:
بڕیارە ئەڤرۆ دەست ب هەڤڕكیێن گەڕا حەفتێ یا خولا ستێرێن ئیراقێ یا تەپا پێی ب ئەنجامدانا چار یارییان بهێنە كرن، هەردو یانەیێن پارێزگەهێ دهۆك و زاخۆ دێ دناڤ ئەرد و جەماوەرێ خوە دا مێڤاندارییا یانەیێن تەلەبە و نەورۆز كەن.
دهۆك دێ شەڕی بۆ قەرەبوویا خالان كەت
ل دەمژمێر 2:30 پشتی نیڤرۆ تیما یانەیا دهۆك ب گەشبینە د ناڤ ئەرد و جەماوەرێ خوە دا ڤەگەڕیتە سەركەفتنان ب رێیا یانەیا تەلەبە یا بەغدایی ئەوا دێ بیتە مێڤانەكا سەنگ بۆ ئەلهۆیێن چیا ئەوا یارییا بۆری دا تووشی خوسارەتیێ بوویی دگەل كەرخێ دێ بزاڤێ كەت ئەڤرۆ جەماوەرێ خوە ئاشتبكەت و ڤەگەڕیتە سەركەفتنان كو نوكە ب11 خالان رێزا چارێ دهێت، بەرانبەردا یانەیا بەغدایی ژ سەركەفتنەكا مەعنەوی دێ هێتە دناڤ یاریگەهێ دا ئەوا نوكە 10خال هەین رێزا حەفتێ دهێت، ئەلهۆیێن چیا دێ بزاڤێ كەت ڤەگەڕێتە سەركەفتنان.
زاخۆ بەرانبەر نەورۆز د دێربیەكێ كوردستانێ دا
هەر ئەڤرۆ ل دەمژمێر 2:30 پشتی نیڤرۆ تیما یانەیا زاخۆ دێ ل یاریگەها خوە و دناڤ پشتەڤانێن خوە دا مێڤاندارییا یانەیا نەورۆز كەت كو دهێتە هژمارتن ئێك ژ یاریێن دێربیێ كوردستانێ د خولا ئیراقێ دا، یارییا كوڕێن خابۆری یا گەڕا شەشێ ل حەفتییا بۆری بەرانبەر ئەلقاسم هاتبوو پاشئێخستن پشتی كو بڕیاربوویی ل دانێ شەڤێ هاتباكرن لێ ژبەر ئاریشەیا تەكنیكی یا كارەبێ نەهاتە ئەنجامدان، زاخۆ ژ پێنج یارییان شەش خال كۆمكرینە رێزا 13ێ دهێت، نەورۆز 10 خال هەنە و رێزا پێنجێ دهێت.
ژ یاریێن دی یێن ئەڤرۆ ئەلقاسم- نەفت ئەلمیسان، كارەبا- كەرخ، دهێتە چاڤەڕێ كرن سوبەهی ژی چار یاریێن دی بهێنە كرن و بڤی شێوەیی، ل دەمژمێر حەفت شەڤ هەولێر دێ نەفت ئەلمیسان ل یاریگەها شەهید فرانسۆ حەریری مێڤانكەت، هەروەسان ئەمانەت بەغدا- شورتە، كەربەلا- نەفت، نەفت ئەلبەسرا- زەورا، رۆژا چارشەمبی، جەوییە- حدوود، مینا- نەجەف.
بۆ زانین جەوییە ب13 خالان ژ پێنج یارییان سەرێ لیستێ دهێت، نەفت میسان، حدوود و دهۆك ب11 خالان رێزێن دویێ هەتا چارێ دهێن، ب 10 خالان نەورۆز، شورتە، تەلەبە پێنجێ هەتا حەفتێ و نەفت نەهـ خال هەنە رێزا هەشتێ و كەرخ، نەفت ئەلبەسرا و زەورا ب هەشت خالان رێزێن نەهێ هەتا 11ێ ل دووڤ ئێك دهێن، ئەلقاسم ب حەفت خالان رێزا 12ێ دهێت، زاخۆ، نەجەف و كەربەلا هەر ئێك شەش خال رێزێن 13ێ هەتا 15 نە، كارەبا پێنج خالان و هەر ئێك ژ هەولێر، ئەمانەت بەغدا، مینا رێزێن 16 هەتا 19ێ ل دووڤ ئێك دهێن، تیما نەفت ئەلوەسەت ب دو خالان رێزا 20ێ و دووماهیێ دهێت.
