شەریف ئیبراهیم: سەرۆكێ حوكمەتا هەرێمێ داخوازییا مە بجهـ ئینا و بەرهەڤین بۆ هەلبژارتنان
محمود نهێلی
د دیدارەكێ دا شەریف ئیبراهیم سەرۆكێ یانەیا شێلادزێ یا وەرزشێ بۆ رۆژنامەیا ئەڤرۆ دیار كر سەرۆكێ حوكمەتا هەرێما كوردستانێ داخوازییا مە بۆ دروستكرنا یاریگەهەكێ بجهـ ئینایە و هەردەمێ ژ مە دهێتە داخوازكرن بەرهەڤین بۆ ئەنجامدانا هەلبژارتنان.
زێدەتر ناڤهاتی گۆت: هەرچەندە ئەڤە دو وەرزە تیما مە یا تەپا پێی پشكداری خولا كوردستانێ دبیت و بێ یاریگەهـ و بنگەهێن، راهێنان و یاریێن مە ل سەر یاریگەهەكا ب كرێ یە، لێ پشتی مە داخواز ژ لەقا 18 یا پارتی دیمۆكراتی كوردستان كری كو ژلایێ بەرەڤان حەمدی بەرپرسێ لەقا ناڤهاتی و بڕێیا نڤێسنگەها رێكخستنا پارتی ل دهۆكێ و د. پشتیوان سادق ب خوەشحالی ڤە داخوازا مە گەهاندبوو مەسرۆر بارزانی سەرۆكێ حوكمەتا هەرێما كوردستانێ ب سۆپاسیڤە رازیبوونا خوە ل سەر دروستكرنا یاریگەهەكا تەپاپێی دا و ب ڕێیا د. عەلی تەتەر پارێزگارێ دهۆكێ ئەو مزگینی گەهاندەمە، ئەڤ یاریگەهە دێ ب گشتی خزمەتا گەنج و لاوێن شێلادزێ كەت و یا پێدڤی بوو، هەروەسان جهـ بۆ هاتییە دەستنیشانكرن، دێ ڤەدیتن بۆ هێتە چێكرن ژبۆ زانینان كۆژمەیێ لێ دهێتە مەزاختن، دێ چاڤەڕێ بن پشتی ڤەدیتنێ ئەو پارەیی بۆ هاتییە مەزاختن بمینت بۆ ئاڤاهیێ كارگێریێ بیت.
هەروەسان ناڤهاتی دیاركر ئەوان داخوازا پەلۆكا كرییە ببیتە جهێ جەماوەری و گۆت: ب ناڤێ یانە و خەلكێ شێلادزێ سۆپاسییا د. شاكر ئەحمەد سمۆ ب دكەین ب هاریكاریا وی ژی یانەیا مە شیا پشكدار بیت د چالاكیان دا و پارێزگاری ژی كێمتر خەمی نەكریە و سوزدایە و ئەو قەرێن مە یێن بەری نوكە ژی چارەسەربكەت و وارشین سەلمان دەڤەردارێ ئامێدیێ ژی یی هاریكار بوویە دگەل مە دا، لێ دخوازین بۆ وەرزی نوو هاریكاریا مە بهێتە كرن دا كو ئەم بشێن پشكدار بین، مە وەرزشڤانێن خودان شیان د هەموو بوارندا هەنە و پێدڤیە گرنگی پێ بهێتە دان و چارەنڤیسیێ وان ب هەروە نەچیت.
ژلایەكێ دووڤە شەریف ئیبراهیم دیاركر وان نوكە چ پلان نینن سەبارەت پشكداریا وان د خولان دا و گۆت: بەری نوكە مە مینحە هەبوو نوكە نەمایە و هەكە مینحا هەر هوسا بمینت نەشێن چو پلانا بدانین و گۆت: هیشتا قەرێن وەرزێن بۆری نە نەداینە و بڤی رەنگی دێ ب زەحمەت بیت، هەرچەندە تا نوكە مە دو تیمێن گەنج و پێشكەفتیان یێن تەپاپێی هەنە و یاریزانێن تێنسا ئەردی، تەپا سەرمێزێ، یاریزانێن غاردانێ و تیما هێزا لەشی، چەند یاریێن دی پێدڤی ب هولەكێ هەیە.
ل دووماهیێ ژی گۆت: بۆ ئەنجامدانا هەلبژارتنێن كارگێرییا یانەیێ هەردەمێ رێڤەبەرییا وەرزشی ئەم ئاگەهداركرین د بەرهەڤین هەرچەندە بەری ماوەكی ئەم بەرهەڤ بووین و دەم ژی هاتبوو دەستنیشانكرن و بەری هەلبژارتنان ب دەمژمێر و نیڤ ژ نشكەكێ ڤە ئەم هاتینە ئاگەهداركرن بهێنە پاشئێخستن و دووڤدا پشتی چەندەكێ و كەفتینە دناڤ چالاكییان دا ب زەحمەت بوو هاتبانە كرن.
