ل بەغدا دهۆك دێ بزاڤێن قەرەبوویا خالان كەت و زاخۆ د تاقیكرنەكا ب هێز دا
چاڤەڕێ دهێتە كرن سوبەهی پێنج شەمبی هەڤڕكیێن گەڕا هەشتێ ژ قۆناغا ئێكێ یا خولا ستێرێن ئیراقێ بۆ یارییا تەپا پێی ب ئەنجامدانا ئێك یاری دەستپێبكەت، ئەینییا بهێت هەردو یانەیێن دهۆك و زاخۆ دێ ل بەغدا مێڤانێن یانەیێن جەماوەری بن.
ئەلهۆیێن چیا ب هیڤینە تۆلێن خوە ڤەكەت
بڕیارە ئەینییا بهێت تیما یانەیا دهۆك ل پایتەختێ ئیراقێ بەغدا ببیتە مێڤانەیا یانەیا زەورا ئێك ژ تیمێن جەماوەری ل سەر ئاستێ ئیراقێ د یارییەكا ب هێز و هەڤڕكی دا ب هیڤیێن تۆلڤەكرنێ ژ یانەیا بەغدایی، ل دووشەمبییا بۆری تیما دهۆكێ دناڤ ئەرد و جەماوەرێ خوە دا تووشی خوسارەتیەكا نە چاڤەڕێكری بوویی بەرانبەر تەلەبە، هەتا خولەكا 90ێ یا سەركەفتی بوو ب گۆلەكێ لێ ب هاریكارییا ڤارێ تیما تەلەبە شیا پێشكەڤیت ب سێ گۆلان بەرانبەر گۆلەكێ، بۆ یارییا سوبەهی راهێنەر و یاریزان ل بن گڤاشتنێن دەرۆنی نە لێ دێ بزاڤێ كەن قەرەبوویا خوسارەتییا خوە بكەن و جەماوەرێ خوە ئاشتبكەن، دهۆك 11 خالان ژ سێ سەركەفتن، دو وەكهەڤی و دو خوسارەتی هەنە، بەرانبەر دا زەورا ژ پێنج یارییان هەشت خال هەنە،
كوڕێن خابووری بەرانبەر قارەمانا وەرزێ بۆری دێ جەنگیت
ژلایێ خوە تیما یانەیا زاخۆ ژی ئەینییا بهێت ل بەغدا دێ بیتە مێڤانا یانەیا شورتە ئێك ژ تیمێن جەماوەری و قارەمانا وەرزێ بۆری یا خولا ئیراقێ، كوڕێن خابۆری ب مۆرالەكا بلند دێ هێنە د ناڤ یاریێ دا پشتی د یارییا بۆری دا ب گۆلەكێ سەركەفتن ل سەر مێڤانا خوە نەورۆزێ ئینایی، ئەڤچەندە وەكرییە باوەرییەكا مۆكم دایە راهێنەرێ وێ یێ قەتەری تەلال ئەلبلۆشی پشتبەستێ ل سەر وێ پێكهاتی و پلانا یارییا بۆری بكەت، زاخۆ نەهـ خال ژ دو سەركەفتن و سێ وەكهەڤییان ئینایە و ئێك خوسارەتی هەیە، بەرانبەر دا یانەیا شورتە ژ شەش یارییان 10 خال كۆمكرینە.
هەولێرێ دێ شەڕێ بەغدایی كەت
تیما یانەیا هەولێر ب ژڤانە ل رۆژا شەمبییا بهێت ببیتە مێڤانا یانەیا جەوییە یا بەغدایی ئێك ژ بهێزترین یاریێن تیما كەلهە و منارە و دبیتە تاقیكرنەكا دی یا بهێز بۆ هەولێرێ، ژلایێ خوەڤە تیما جەوییە دو یاریێن وێ هاتینە پاشئێخستن تیما ئێكانیە تووشی چو خوسارەتییان نەبوویە و هەڤڕكا سەرێ لیستێ یە.
نەورۆز پێدڤی ب سەركەفتنێ یە
یانەیا نەورۆز ل باژێرێ سلێمانیێ دێ مێڤاندارییا یانەیا كارەبا یا بەغدایی كەت د یارییەكا ڤەگەڕاندنا باوەریێ و هێزێ و باشتكرنا ئەنجامێن خوە ئەوا نوكە 10 خال هەین رێزا حەفتێ دهێت ب شێوەكێ بەروەخت، مێڤانا وێ كارەبا ل دەستپێكێ وەكو هەسپێ رەش دهاتە دیتن لێ ئاست و ئەنجامێن ڤێ دووماهیێ بەرۆڤاژی دەركەفتینە و نوكە شەش خال هەنە ژ شەش یارییان.
ژ یاریێن دی، رۆژا پێنج شەمبی، نەفت میسان، نەفت ئەلوەسەت، رۆژا ئەینی، كەرخ- كەربەلا، نەفت- ئەمانەت بەغدا، رۆژا ئەینی، حدود- ئەلقاسم، نەجەف- نەفت ئەلبەسرا، تەلەبە- ئەلمینا.
