هشیار شه‌هباز: د ڤه‌گوهاستێن زڤستانێ دا دێ كێماسیان چاره‌سه‌ركه‌ین
عەلی حاجی:
د داخویانیەکێ دا سکرتێرێ یانه‌یا زاخۆ بۆ رۆژناما ئەڤرۆ دیار کر دێ هەتا چار یاریزانان ژ تیما ته‌پاپێی یا پشکدار د خولا ستێرێن ئیراقێ دا دوورئێخن و چارێن دی زێدەکەن.
زێدەتر هشیار شەهباز گۆت: دگه‌ل ڤه‌كرنا دەرگەهێ ڤەگۆهاستنێن زڤستانێ وەکو کارگێرییا یانه‌یا زاخۆ لژنەیەک پێکئینایە ژبۆ ئینانا یاریزانێن نوو بۆ چاره‌سه‌ركرنا ئه‌وان کێماسیێن دناڤ تیمێ دا، هه‌روه‌سان بزاڤێ دكه‌ین پیشه‌كارێ تیما مە گۆستاڤۆیی ڤەگەرینن ڤە و ئەو ژی حەسدکەت بهێت، هەتا ٢٠ ڤێ مەهێ دێ دووماهی دەلیڤە بیت ئەو یاریزان بریارەکێ ل دور ڤەگەریانا خوە بدەت، پێشەکارێ مه یێ دی سانتۆس ژ تیمێ دوورئێخستیە و دێ سێ یاریزانێن دیتر ژی دوورئێخین ژبەرکو ژ ئاستێ وان رازی نەبووینه، ئەم دگەل هندەک یاریزانێن دیتر ب تایبەتی یێن ل هێلا ناڤین و هێرشبەریێ دانوستاندنان داینە ژبۆ ئینانا چار ژ وانا، بێگومان ژی ل جهێ یاریزان سانتوسی دێ یاریزانەکێ دیتر یێ پێشەکار ئینن دناڤ تیمێ دا، ل هێلا بەرەڤانیێ لایێ راستێ ژی مە کێماسی هەیە له‌وما دگەل یاریزانەکێ ئیراقی د ئاستەکێ باش گەلەک نێزیک بووینە، ل وێ باوەرێ دێ گەهینە رێکەڤتنا دووماهیێ.
ناڤبری گۆت ژی: ئەو یاریزانێن بهێنە دوورئێخستن د چەند یارییەکان دا یاری ب شێوەیەکێ سەرەکی ژی ئەنجامداینە لێ ئەم یێ کار دکەین ژ ئاستێ وان یاریزانان باشتر بن هەڤبەستێ دگەل دا ئیمزا بکەین و مە نەڤێت هەر وان کێماسیان دناڤ تیمێ دا بهێلین، ئەم ب ئارامی کارێ خوە دکەین و ڕاوەستیانا خولێ د بەرژەوەندیا مە دایە.
