پەروەر حسێن: یاریزانێ رێزێ ل یانەیا سێمێلێ نەگریت جهێ وی د ناڤ مە دا نینە
د داخویانیەكێ دا جێگرێ سەرۆكێ یانەیا سێمێل دیار كر ژبەر نە پێگیرییا هەرسێ یاریزانێن وان یێن پیشەكار ب بەند و رێنمایێن گرێبەستا دناڤبەرا واندا، نەچاربوو بڕیارا دوورئێخستنا وان بدەن و سێ پیشەكارێن دی پەیوەندی ب تیما وان یا تەپا پێی كرییە.
زێدەتر پەروەر حسێن بۆ رۆژنامەیا ئەڤرۆ گۆت: پشتی كو هەرسێ یاریزانێن تیما مە یا تەپا پێی موستەفا محەمەد، سەربەست حسێن و هیشام محەمەد رێز ل گرێبەستا خوە دگەل مە نە گرتی و پێگیری ب بەندێن وێ نەكرین ئەم نەچاربووین ب شێوەكێ فەرمی دەست ژ وان بەردەین، ژبەركو ئێك ژ بەندێن یاسایی یێن گرێبەستێ ئەوە هەر یاریزانەكێ دگەل یانەیا سێمێلێ ئیمزابكەت نا بیت بۆ هیچ یانەكا دی بكەت ئەوێن پشكدار د خولێن ئیراقێ دا، لێ مخابن هەرسێ یاریزانێن ناڤهاتی بێ رازیبوون و ئاگەهداربوونا مە گرێبەستا یانەیا ئەلخالس یا مووسلی ئیمزاكربوون و پشكداری یاریێ ژی بووینە، سەرباری هەرسێ یاریزانێن مە سەرەكی ژی بوون و زیرەكێن تیمێ بوون لێ ناڤێ یانەیێ و رێزگرتنا وێ ژ هەر یاریزانەكێ بوهاترە.
هەروەسان ناڤهاتی گۆت ژی: هەروەسان ژبەر ئەگەرێن جودا دو یاریزانێن دی ژی مە دەست ژێ بەردایە، لێ بەرانبەر دا بزاڤێن مەزن هاتینە كرن و شیاین دو یاریزانێن پیشەكار رازی بكەین و پەیوەندیێ ب تیما مە بكەن ئەو ژی هەر ئێك ژ عەلی قاسم ل وەرزێ 2016ێ پیشەكاربوو د خولا تایلەندێ دا، هەروەسان دگەل یانەیێن كەرخ،سیناعە، نەجەف، پێشمەرگەیا سلێمانی، حسێن، رۆمادی و حەشدێ بوو دیسان ل 2018ێ گۆلكەرێ خولا پلا ئێك بوو، ب هیڤی نە بۆ یارییا ئەینییا بهێت دێربیێ پارێزگەهێ دگەل یانەیا تەناهی یاریێ بكەن یاریزانێ دویێ یێ پیشەكار عەمار ئەلعانی.
ژلایەكێ دووڤە پەروەری گۆت: ب خوەشحالی ڤە ئەم شیایین كوڕێ باژێرێ سێمێلێ ئەركان عەبدولخالق یاریزانێ یانەیا هەولێر ل سەر ئاستێ لاوان رازی بكەین و بهێتە دناڤ رێزێن تیما مە دا، ئەڤچەندە ژی دێ بیتە ئەگەر زاخەكا باشتر بۆ تیمێ بهێتە دان بەری یارییا مە یا بهێت و گەشبینن بەردەوامیێ بدەینە سەركەفتنان، سەرباری ئاستەنگێن دارایی و ب ئۆمێدێن پشتەڤانییا پارێزگارێ دهۆكێ و قائیمەقامێ سێمێلێ یانەیا مە دێ بەردەوامبن ل سەر هەڤڕكییان.
