سێ مادەیێن دستوورێ ئیراقێ پشتەڤانیێ ل قانوونی بوونا گرێبەستێن پەترۆلێ یێن هەرێمێ دكەن
بسپۆرەكێ وزێ رادگەهینیت:سێ مادەیێن سەرەكی د دستوورێ ئیراقێ دا، بەلگەنە ل سەر قانوونی بوونا گرێبەستێن پەترۆلێ یێن هەرێما كوردستانێ.
گۆڤەند شێروانی، پسپۆرێ وزێ و شرۆڤەكارێ ئابۆری د داخۆیانیەكا رۆژنامەڤانی دا گۆت: مادەیا 117 ژ دستوورێ ئیراقێ كو قەوارەیێ دستووری یێ هەرێما كوردستانێ دپارێزیت پشتەڤانیەكا ب هێزە بۆ ب قانوونی بوونا گرێبەستێن پەترۆلێ یێن هەرێما كوردستانێ ل گەل كۆمپانیان».
گۆت ژی: ب هەمان شێوە مادەیا 121 ژ دستوورێ ئیراقێ كو هەموو دەستهەلاتێن قانوون دانانێ و بجهئینانێ ب هەرێما كوردستانێ داینە، دیسان بەلگە و پشتەڤانیەكا دی یە بۆ قانوونی بوونا ئەوان گرێبەستێن هەرێما كوردستانێ كو ل گەل كۆمپانیێن پەترۆلی ئەنجامداین.
ناڤبری باس ل ئەوێ چەندێ ژی كر» پێدڤی دكەت هەرێما كوردستانێ دوپاتیێ ل سەر ئەوان مادەیێن دستووری بكەت و وەكو پشتەڤانی بۆ گرێبەستێن خوە یێن پەترۆلی پست بەستنێ ل سەر بكەت و بەرامبەر ئیراقێ بەرسڤ هەبیت.
گوڤەند شێروانی دیاركر ژی» مادەیا 141 ژ دستووری، ئێك ژ پشتەڤانێن دی یێن ب هێزە بۆ گرێبەستێن پەترۆلی یێن هەرێما كوردستانێ، چونكە ئەوێ مادەیا دستووری رۆهنكریە كو هەموو قانوون و بڕیارێن هەرێما كوردستانێ ب گرێبەستان ڤە ژی كو پشتی سالا 1992 ل هەرێما كوردستانێ هاتینە دەركرن، ب بجهئینای دهێنە هەژمارتن».
