دهۆك گەشبینە پیشەكارێ تۆنسی ئاریشەیا هێلا هێرشبەریێ چارەسەردكەت
د داخویانیەكێ دا رێڤەبەرێ تیما تەپا پێی یا یانەیا دهۆك دیار كر ب فەرمی گرێبەست دگەل پیشەكارێ تۆنسی و یانەیا دالكۆرد یا سویدی عیماد ئەللواتی ژبۆ پشكداریێ دگەل تیما وان یا تەپا پێی خوە بەرهەڤكرن بۆ یاریێن داهاتی یێن خولا ستێرێن ئیراقێ یا تەپا پێی.
زێدەتر جاسم محەمەد حاجی بۆ رۆژنامەیا ئەڤرۆ گۆت: ب فەرمی گرێبەست دگەل پیشەكارێ تۆنسی عیماد ئەللواتی هاتیە ئیمزاكرن و گەشبینین دێ شێت ئەوێ ڤالاتییا دناڤ هێلا هێرشبرنێ دا چارەسەر كەت، یاریزانی ناڤهاتی دێ بیتە دووماهی پیشەكار بۆ ناڤ تیمێ دا و دێ پشت بەستنێ ل سەر پێكهاتیێ خوە و شیانێن كادرێ راهێنانێ كەین و ئارمانجا مە بشێن بەردەوامیێ بدەینە ئەنجامێن سەركەفتی و ب هێزتر ڤەگەڕێتە دناڤ خولێ دا.
زێدەتر ناڤهاتی گۆت: ب مەرەما باشترین بەرهەڤی بۆ یاریێن بهێت یێن خولێ و د هەمان دەمدا مفایی ژ راوەستیانا خولێ وەربگرین ئەڤرۆ تیما مە كەمپەكێ راهێنانێ ل بەغدا پایتەختێ ئیراقێ دانایە و دهێتە پێشبینیكرن بۆ ماوەیێ دەهـ رۆژان یا بەردەوام بیت و دێ بزاڤێ كەین چەند یاریێن هەڤالینی ل دووڤ كاودانێن وی دەمی ئەنجامبدەین، ئەڤچەندە ژی ژبۆ هندێ یە كو راهێنەرێ مە ئەحمەد خەلەف و هاریكاری وی عەلی وەهیب باشتر نێزیكی یاریزانان و ئاستێ وان بزانن دیسان ل سەر كێماسییان ژبۆ چارەسەركرنێ و ببیتە دەلیڤە گۆنجاندنەكا باشتر پەیدابیت.
بۆ زانین دو یاریزانێن گەنج و خەلكێ پارێزگەهێ ل یانەیا دالكۆرد یا سویدی هارۆن ئەحمەد و ئەیسەر قاسم هاتینە دناڤ رێزێن تیما دهۆكێ دا و دو یاریزانێن دی یێن خودان سەربۆر و شیان هاتینە زێدەكرن ژبۆ چارەسەركرنا كێماسیان تایبەت هێلا بەرەڤانیێ یا لایێ چەپێ، تیما دهۆكێ پشتی بۆرینا 12 گەڕان تیما یانەیا دهۆك د خولا ستێرێن ئیراقێ دا رێزا پێنجێ دهێت ب كۆمكرنا 18 خالان، ژپێنج سەركەفتن، سێ وەكهەڤی وچار خوسارەتییان.
