ژڤانێ ئێكەمین كۆمبوونا جڤاتا نوو یا پارێزگەها كەركووكێ هاتە دیاركرن
پارێزگەها كەركووكێ د نڤیسارەكێ دا ژڤانێ ئێكەمین كۆمبوونا جڤاتا نوو یا پارێزگەها كەركووكێ دیاركر و ب رێكا ئیدارەیا جڤاتێ ژی ڤە داخوازا ئاگەهداركرنا ئەندامێن جڤاتێ كرییە بەرهەڤی ئێكەمین كۆمبوونا جڤاتا پارێزگەها كەركووكێ ببن.
نڤیسینگەها پارێزگارێ كەركووكێ دوهی سێشەمبی 30/1/2024، نڤیسارەكا هەڤپێچ ل گەل ناڤێن ئەندامێن سەركەفتی بۆ جڤاتا پارێزگەها كەركووكێ ئاراستەی هەر ئێك ژ نڤیسینگەها سەرۆك وەزیرێن ئیراقێ، جڤاتا كۆمسیارێن كۆمسیۆنا بلند یا سەربخوە یا هەلبژارتنان ل ئیراقێ و پشكا كارگێری یا جڤاتا پارێزگەها كەركووكێ كرییە، داخواز ژی ژ هەموو ئەندامێن جڤاتێ كرییە، ل نیڤرۆیا سوباهی پێنجشەمبی 1/2/2024 بەرهەڤی ئێكەمین كۆمبوونا جڤاتا پارێزگەها كەركووكێ ببن.
ل رۆژا دوشەمبییا بۆری ئەندامێن جڤاتا پارێزگەها كەركووكێ سویندا قانوونی خواند، هەروەسا حەسن مەجید، سەرۆكێ لیستا پارتی دیموكراتی كوردستان ل جڤاتا پارێزگەها كەركووكێ گوت» دێ بزاڤێ كەین رەوشا كاگێری ل كەركووكێ بۆ سەردەمێ بەری روودانێن 16 ئۆكتۆبەرێ و سەپاندنا پارێزگارەكێ خوەسەپاندی بزڤرینین و دێ كار كەین بۆ كێمكرن و نەهێلانا كاریگەریێن ئەڤ چەند سالێن بۆری ل كەركووكێ كەین».
