موعین كازمی: حوكمەت دێ پڕۆژەیێ راستڤەكرنا قانوونا بودجەی هنێریتە جڤاتا نوونەران
ئەندامەكێ لژنەیا دارایی ل جڤاتا نوونەرێن ئیراقێ پێشبینیێ دكەت هەتا ناڤەڕاستا ئەڤێ مەهێ، حوكمەتا ئیراقێ پڕۆژەیێ راستڤەكرنا قانوونا بودجەی بهنێریتە جڤاتا نوونەران، هەروەسا دبێژیت دەنگدان ل سەر راستڤەكرنا پڕۆژەقانوونا بودجەی دەمەكێ زۆر بۆ نەڤێت.
موعین كازمی، ئەندامێ لژنەیا دارایی ل جڤاتا نوونەرێن ئیراقێ گوت» هنارتنا گۆژمەیێ 618 ملیار دیناران بۆ هەرێما كوردستانێ پشكەكە ژ پارەداركرنا حوكمەتا هەرێما كوردستانێ ژ پشكا بودجەیا گشتی یا ئیراقێ و قەر نینە و دێ ب شێوەیێ مەهانە بەردەوام بیت».
ناڤبری ب پێدڤی ژی زانی د نوكە دا تێكگەهشتنا زێدەتر هەبیت بۆ زێدەكرنا ئەوی گۆژمەیێ پارەی و هنارتنا وی بۆ هەرێما كوردستانێ، هەروەسا پێشبینی كر ئەڤ گۆژمەیە بهێتە زێدەكرن ب تایبەت كو د هەمان دەم دا حوكمەتا ئیراقێ پێدڤی ب گۆژمەیەكێ زێدەتر یێ پارەیێ بودجێ یە بۆ بجهئینانا پڕۆژەیان ب تایبەت ل بەغدا، د ئەڤی حالەتی ژی دا هەرێما كوردستانێ دێ زێدەتر مفادار بیت ژ وەرگرتنا پشكا خوە ژ بودجەیا گشتی یا ئیراقێ.
سەبارەت راستڤەكرنا قانوونا بودجەی گۆت: ل ناڤەڕاستا ئەڤێ مەهێ پڕۆژە قانوونا راستڤەكرنا قانوونا بودجەی ژ ئالیێ حوكمەتا فیدرالی ڤە دێ هێتە هنارتن بۆ جڤاتا نوونەران» ئاماژەكر» حوكمەت یا پێگیرە ب هندەك راستڤەكرنان بۆ نموونە زێدەكرنا تێچوویێ بەرهەمئینانا پەترۆا خاڤ، زێدەكرنا گۆژمەیێ تێچوونا بەرهەمئینانا كارەبێ و زێدەكرنا كرینا كەنمێ جوتیاران و چەند بابەتێن دی».
موعین كازمی باس ل ئەوێ چەندێ ژی كر: هەكە حوكمەت پڕۆژەیێ راستڤەكرنێ بهنێریتە جڤاتا نوونەران، دەمەكێ زۆر پێ ناچیت بۆ دەنگدانێ ل سەر، ب شێوەیەكی ژ مەهەكێ دەرباز ناكەت و دەنگ دێ ل سەر هێتە دان».
