دهۆك د تاقیكرنەكا ب هێز دا رابین هاشم: دێ بزاڤێ كەین چو خالان ژ دەست نەدەین
چاڤەڕێ دهێتە كرن ئەڤرۆ ل دەمژمێر 2:30 پشتی نیڤرۆ تیما تەپا پێی یا یانەیا دهۆك ل باژێرێ پیرمام یا هەولێرا پایتەخت ببیتە مێڤانا یانەیا پێشمەرگەیا هەولێرێ د یارییەكا ب هێز دا ژ چارچووڤەیێ هەڤڕكیێن گەڕا 18ێ یا خولا پلا نایابا كوردستانێ.
تیما یانەیا دهۆك ئەوا د نوكە دا ب 18 خالان ژ چار سەركەفتن، شەش وەكهەڤی و حەفت خوسارەتییان ل رێزا 12ێ دهێت، بۆ ڤێ یاریێ دێ بزاڤێ كەت سەركەفتنێ ل سەر خودانێن ئەردی پێشمەرگەیا هەولێر بینت ب هیڤیێن وێ چەندێ زێدەتر پێشڤە بهێت و خوە ژ رێزبەندیا دووماهیێ قۆرتالبكەت، ژبەركو دناڤبەرا وێ تیما دووماهیێ بتنێ دو خالن، هەروەسان ئەڤ رێزبەندییە یا ژ هەژی یانەكا مەزن و خودان جەماوەرە و دیرۆكەكا پری دەستكەفت و پشكداریێن نێڤدەولەتی نینە، لێ د بەرانبەردا تیما پێشمەرگە ژ هەڤڕكێن ب هێزە و بزاڤێ بۆ رێزێن پێشیێ دكەت ئەوا نوكە ب25 خالان رێزا شەشێ دهێت، ئەركی راهێنەر و ئەلهۆیێن تیما دهۆكێ ب سانەهی نابیت لێ رژدییا وان ژی بۆ سەركەفتنێ دێ بیتە رێكەك ب سێ خالان ڤەگەڕین.
رابین هاشم راهێنەرێ تیما یانەیا دهۆكێ بۆ رۆژنامەیا ئەڤرۆ گۆت: یاری بۆ یاری ئاستێ تیمێ باشترە سەرباری ژ دەستدانا چەند خالان، لێ یا گرنگ بوو مە ڤەگەڕاندنا هێزا دهۆكێ یە ب رێیا ڤەگەڕاندنا مۆرالا یاریزان و باشتكرنا دەرۆنێ وان بۆ هەر یاریەكێ، ئارمانجا مە بۆ هەر یارییەكێ بزاڤێ بكەین چو خالان ژ دەست نەدەین ژبۆ پێشڤەبرنا تیمێ بۆ رێزێن باشتر، یارییا ئەڤرۆ ب سانەهی نابیت لێ رژدین ب گەهینە ئارمانجا خوە.
ژ یاریێن دی یێن ئەڤرۆ، ئارارات- شێروانە، سەیدسادق- سۆران، برایەتی- هندرین، بۆ زانین بەری ئەنجامدانا یاریێن گەڕا 18ێ شێروانە ب31 خالان سەرێ لیستێ دهێت، ئاكرێ 29 خال، سیروانی نوو 28 خال، چوارقۆرنە 27خال، دەربەندیخان 25 خال، پێشمەرگەیا هەولێر 25خال رێزێن دویێ هەتا شەشێ دهێن، زاخۆ ب25خالان رێزا حەفتێ دهێت، هندرین ب22خالان، رانیە 21خال، برایەتی 21خال، ئارارات ب20 خالان رێزێن هەشتێ هەتا 11ێ دهێن، تیما دهۆك ب18 خالان رێزا 12ێ دهێت، سۆران 17خال، شەقلاوە 16خال و سەیدسادق ب16 خالان رێزێن 13 هەتا 16 و دووماهیێ دهێن.
