زاخۆ چاڤه‌ڕێ هەولێرێ و شێرکۆیە
د داخویانیەکێ دا ئەندامەکێ دەستەیا کارگێریا یانه‌یا زاخۆ یا وەرزشی بۆ رۆژناما ئەڤرۆ دیار کر ئەو دگەل شێرکۆ کەریم گەهشتینە رێککەڤتنا دووماهیێ و پێدڤییە یاریزان دەست بەردانا خوە وەربگریت.
زێدەتر دلژار عەدنان گۆت: تیما مە د رۆژێن بوری دا دو یاری ژ كۆپا ئیراقێ یا تەپا پێی ئەنجامداینە و ئەڤچەندە ژی د بەرژەوەندیا تیما مە دا بوو ژبەرکو پشتی دەرگەهێ ڤەگوهاستنا زڤستانێ ڤەبوویی مە دەست ژ چەند یاریزانێن خوە بەردا ل شوینا وان سێ یاریزان ل تیما خوە زێدەکرینە هەر سێ ژی پێشەکارن، بێگومان ڕاوەستیانا خولێ بۆ رێیەک ئەم بشێن پتر خوە بەرهەڤبکەین بۆ قوناغا دویێ یا خولا ستێرێن ئیراقێ و لێک تێگەهشتنەک دناڤبەرا یاریزانێن نوو و کەڤن دا پەیدابوویه ب تایبەتی ژی پشتی تیما مە دو یاری د كۆپا ئیراقێ دا ئەنجامداین، سەرکەڤتنا مە د وان دو یاریان ژی دا دێ تیما مە ب دەروونەکێ باشتر دەست ب یاریێن خوە کەت د قوناغا دویێ دا و هەتا نوکە مە چو کێماسی د ناڤ تیما خوە دا نەهێلاینە و هەمی کێماسی ژی چارەسەر کرینە.
ناڤبری گۆت ژی: ئەم دگەل شێرکۆ کەریمی گەهشتینە رێککەڤتنا دووماهیێ و پێدڤیە ل سەر یاریزانی دەست بەرداربوونا خوە ژ یانه‌یا هەولێرێ وەربگرت ژ نوو دێ هەڤبەستێ دگەل دا ئیمزا کەین و ئەم رێکێ ب چوونا چو یاریزانان نادەین هەتا کو یاریزانەکێ باشتر ل جهێ وی پەیوەندیێ ب تیمێ بکەت و مە باوەرییەکا تەمام ژی ب تیما خوە هەیە.
