زاخۆ دڤێت دو یاریزانان ڤەگوهێزیت
عەلی حاجی:
د داخویانیەکێ دا سکرتێرێ یانه‌یا زاخۆ یا وەرزشی بۆ رۆژنامه‌یا ئەڤرۆ دیار کر بۆ چارگوشه‌یا زێرین وان دڤێت دو یاریزانان بۆ تیما خوه یا فوتسالێ ڤەگوهێزن و ئەو چاڤەرێ ڤه‌كرنا ده‌رگه‌هێ ڤه‌گۆهاستنانه.
زێدەتر هشیار شەهباز گۆت: د قۆناغا کومان دا هەتا ڕادەیەکێ ژ ئاستێ تیما خوە د خولا نایابا کوردستانێ یا فوتسالا کچان دا د رازیبووین و ئارمانجا مە یا ئێکێ ژی دەربازبوون بۆ قوناغا چارگوشه‌یا زێرین د خولێ دا،مە د قۆناغا کومان دا کێشەیەکا مەزن هەبوو ژبەرکو سێ ژ یاریزانێن مە یێن سەرەکی پەیوەندی ب کەمپا دەستنیشانکرنا یاریزانان بۆ هەلبژارتیێ ئیراقێ کربوون و رۆژەکێ ژبەریا یاریێ دگەهشتنە باژێرێ زاخۆ یان ژی پەیوەندی ب تیمێ کرن، بریارە هەر ئێک ژ یاریزانان دێرین و دەریا بچنه دگه‌ل هەلبژارتیێ ئیراقێ یێ فوتسالێ و پەیوەندیکرنا وان دو یاریزانان ب هەلبژارتی د بەرژەوەندیا مە دا نینە ژبەرکو د حەفتییا بهێت دا هەلبژارتیێ ئیراقێ دێ کەمپەکێ ل وەلاتێ ئیماراتێ دانیت و ئەم چاڤەرێ بریارا یاریزانێن خوە نە.
ناڤبری گۆت ژی: ئێکەتیا کوردستانێ دگەل تیما مە گەلەک هاریکارە و پەیوەندیێن مە ژی د ئاستەکێ باش دانە و هەکە هەر دو یاریزانێن مە پەیوەندی ب هەلبژارتی کرن و دەرگەهێ ڤەگوهاستنا یاریزانان ژی ڤەبوو د وی دەمی دا دێ هەڤبەستێ دگەل یاریزانان گرێدین هەکە یاریزانێن باش هەبن و مفایی ل تیما مە بکەن.
بۆ زانین تیما ئافره‌تێن یانه‌یا زاخۆ ب كۆمكرنا12 خالان سه‌رێ لیستا كۆما دویێ هات و ده‌ربازبوو قۆناغا چارگۆشه‌یا زێرین، بریاره ل ئه‌ینییا بهێت یارییا خوه یا ئێكێ ژ ده‌رڤه‌یی یاریگه‌ها خوه به‌رانبه‌ر كچێن یانه‌یا سۆران بكه‌ت.
