سێمێل هاتە سزادان و یارییا دهۆك و زاخۆ بۆ هەولێرێ هاتە ڤەگوهاستن
فیدراسیۆنا فوتبۆلا كوردستانێ د دووماهی كۆمبوونا خوە یا ئاسایی دا و پشت بەستن ل سەر راپۆرتێن سەرپەرشتیا و دادڤانێن یاریێن خولا پلا ئێك یانەیا سێمێل ب كۆژمەكێ پارەیی هاتە سزادان و هەروەسا یارییا ئافرەتێن دهۆك دگەل كچێن زاخۆ بۆ هەولێرێ هاتە ڤەگۆهاستن.
د كۆمبوونا خوە دا بڕیار و راسپاردە و تەوەرێن جودا هەبوون ژ وانا خواندن و گەنگەشەكرنا راپۆرتێن سەرپەرشتیار و دادڤانێن یاریێن گەڕا 13ێ یێن خولا پلا ئێكا كوردستانێ بوون، پشتی ڤەدیتنا راپۆرتا سەرپەرشتیار و دادڤانێ یارییا سێمێل و كۆیە ئەوا ل یاریگەها سێمێلێ هاتیە كرن كو ل دووڤ راپۆرتا وان تێدا جەماوەرێ یانەیا سێمێل دوور ژ گیانێ وەرزشی پشتەڤانی دكرن، دیسان ل دووڤ رێنمایێن خولێ بڕیار هاتە دان ب سزادانا یانەیا سێمێلێ ب كۆژمەیێ 250 هزار دینارا و هۆشدارییا دووماهیی بۆ یانەیا سێمێل كۆننترۆلكرنا جەماوەرێ یانەیێ بكەت دا تووشی سزایێن گرانتر نەبن.
هەروەسان فیدراسیۆنا فوتبۆلا كوردستانێ بڕیار دا یارییا دووماهیێ یا خولا فوتسالا كوردستانێ ژ پارێزگەها دهۆكێ بهێتە ڤەگۆهاستن بۆ هەولێرا پایتەخت ئەوا دهێتە چاڤەڕێ كرن د ناڤبەرا ئافرەتێن یانەیا دهۆك و كچێن یانەیا زاخۆ بهێتە كرن و دبیت ژڤانێ وێ ل حەفتییا بهێت دەستنیشان بكەن، دیسان بڕیار دا یارییا دووماهییا كۆپا كوردستانێ ژی ل باژێرێ زاخۆ بهێتە كرن و بڕیار هاتیە دان هەرچاریانەیێن دەربازبوویی بۆ پێش دووماهییا كۆپا كوردستانێ ئەوژی دهۆك، زاخۆ و هندرین ڕانیە ل بارەگایی فیدراسیۆنێ بەرهەڤبن ژبۆ ئەنجامدانا پشككێشانا دیاركرنا یاریگەهێ بۆ قۆناغا بهێت.
