ئەڤرۆ دێربییا پارێزگەهێ دێ یا ئاگرین بیت
قەیس وەیس:
بڕیارە ئەڤرۆ ل دەمژمێر 2:30 پشتی نیڤرۆ یاریگەها دەلال مێڤاندارییا خودانێن ئەردی یانەیا زاخۆ و مێڤانا وێ یانەیا دهۆك ژ چارچووڤەیێ هەڤڕكیێن گەڕا 23ێ یا خولا پلا نایابا كوردستانێ یا تەپاپێی بكەن كو دهێتە پێشبینیكرین جەماوەرێ هەردو یانەیان چاڤ ل دیتنا ئەڤێ یاریێ و دهێتە هژمارتن دێربییا ئاگرین یا پارێزگەها دهۆكێ و بەهدینانە.
محەمەد یوسف گەشبینە ئێكەم دیاری پێشكێشی جەماوەری بكەت
كوڕێن خابووری ب ئاست و ئەنجامێن خوە یێن نە خوەجهـ هەتا نوكە ب 30 خالان رێزا نەهێ دهێت ژ شەش سەركەفتن و 12 وەكهەڤی و چار خوسارەتی هەنە، بوو ئەگەر راهێنەرێ بەرێ یێ تیمێ عزەدین عەسكر دەست ژ كارێ خوە ب كێشیت و كارگێرییا یانەیێ قەبوولبكەت و دووڤدا راهێنەرێ خەلكێ سێمێلێ محەمەد یوسف بۆ هەتا دووماهییا وەرزێ ئەڤ سالە بهێتە دەستنیشانكرن ئەوێ سەربۆرەكا باش هەیی دگەل یانەیێن زاخۆ و دهۆك و سێمێل د خولێن كوردستانێ و ئیراقێ دا، لەوما بۆ یارییا ئەڤرۆ دێ بزاڤێ كەت ئێكەم دیاری ب سەركەفتن پێشكێشی جەماوەرێ یانەیێ بكەت.
دهۆك دێ بزاڤێن تۆلڤەكرنێ كەت
ژلایێ خوەڤە تیما یانەیا دهۆك ب سەركێشییا راهێنەرێ وێ یێ نوو رابین هاشم شیاییە ئاست و ئەنجامێن ناڤنجی بینت ژ چار یارییان دو سەركەفتن و دو خوسارەتی هەنە لێ شیاییە ب ئەوان شەش خالان تا رادەیەكی ژ رێزێن دووماهیێ دووربێخیت ئەوا نوكە ب 27 خالان رێزا 10ێ دهێت ژ حەفت سەركەفتن، شەش وەكهەڤی و نەهـ خوسارەتییان كو دوەم تیمە زوورترین گۆل ل سەر هاتینە تۆماركرن ب 32 گۆلان، لێ پشتی هاتنا راهێنەرێ نوو تا رادەیەكی ئەڤ كێماسییە چارەسەركرییە، بۆ یارییا ئەڤرۆ ئەركێ وێ ب زەحمەتە لێ د یارییا تەپا پێی دا هەمی پێشبینی دهێنە كرن و دێ شەڕی بۆ دەستڤە ئینانا خالێن یاریێ كەت و تۆلێن قۆناغا ئێكێ ڤەكەت ئەوا ب دو گۆلان بەرانبەر گۆلەكێ تووشی خوسارەتیێ بووی.