نەوال مووسەوی: مەرەم ژ ئارمانجگرتنا كۆرمۆر تێكدانا رێككەفتنا د ناڤبەرا حوكمەتا هەرێما كوردستانێ و حوکمەتا ئیراقێ دا یە
ب/ عەدنان رێكانی:
شرۆڤەكارەكا سیاسی دبێژیت، هێرشا ل سەر كێلگەها كۆرمۆر بزاڤەكە بۆ تێكدانا ئێمناهی و سەقامگیرییا هەرێما كوردستانێ، هەڤدەم گڤاشتنەكا نێڤدەولی ژی هەیە بۆ هندێ رێككەفتنا نوویا د ناڤبەرا حكومەتا هەرێما كوردستانێ و حكومەتا ئیراقێ ل دۆر كەرتێ پەترۆلێ و گازێ نەهێتە ئەنجامدان.
شرۆڤەكارا سیاسی (نەوال مووسەوی ) راگەهاند، هێرشا ل سەر كێلگەها گازا كۆرمۆر یا جودایە ژ هێرشێن سالێن بەرێ، چونكی نوكە پێشهاتێن نوو ل مەیدانا سیاسی هەنە، رێككەفتنا دناڤبەرا حكومەتا هەرێما كوردستانێ و ئیراقێ پشككە ژ وێ ئارمانجگرتنێ دا، ئەو كەسێن هێرشكرین ئارمانجانا وانا تێكدان و ژناڤبرنا وێ رێككەفتنێ یە.
نەوال مووسەوی هەروەسا گۆت: هێرشا ل سەر كێلگەها كۆرمۆر بزاڤەكە بۆ تێكدانا رەوشا ئێمناهی و سەقامگیرییا هەرێما كوردستانێ، زێدەباری وێ چەندێ ڕێگری ل هەمبەری وبەرهەمئینانا گازا كۆرمۆر بهێتە كرن، ئەڤە ژی گونەهباریەكا راستەوخۆیە بۆ وەلاتێ ئیرانێ و رووسیا.
شرۆڤەكارا سیاسییا ئیراقی ئەو چەندە ژی نەڤەشارت ، كو هێرشكرنا ل سەر كێلگەها كۆرمۆر لێدانا سەروەریا ئاخا ئیراقێ یە، هەروەسا گڤاشتنەكا ل سەر هەرێما كوردستانێ دهێتە كرن، گڤاشتنەكا نێڤدەولەتێ هەیە بۆ هندێ چو رێككەفتنێن نوو د ناڤبەرا حكومەتا ئیراقێ و هەرێما كوردستانێ سەبارەت بابەتێن پەترۆل و گازێ نەهێنە ئەنجامدان.
نەوال مووسەوی دووپاتكر، ئیرانێ دڤێت دەست ب سەر بازارێ ئیراقێ دا بگریت، چونكە پشكا هەرە زوور یا غازا ئیراقێ ژ وەلاتێ ئیرانێ دهێت، لەوما ئیرانێ نەڤێتن ئیراق پشت بەستنا خوە ب ژێدەرەكێ دیتر یێ گازێ ژ بلی گازا ئیرانێ بكەت، پێدڤیە حكومەتا فیدرالا ئیراقێ ڕێكارێن توند ل بەرانبەری ڤێ روودانێ بگریت، كو دجودابن ژ ڕێكارێن بەری نوكە، ئەو لیژنەیا هاتیە پێكئینان بۆ ڤەكۆلینان پێدڤیە كارێن خوە ب ڕێك و پێكی ئەنجام بدەن.
نەوال مووسەوی ل دووماهیێ دووپاتكر، پێدڤیە حكومەتا فیدرالا ئیراقێ رێگریێ ل هەمبەری چالاكی و بزاڤێن گرۆپێن چەكدارێن دەرڤەیی قانوونی بگریت، ئەو هەردەم ئەگەرێ هێرشێن تێكدرن و دژی ئارامی و تەناهیا ئیراقێ نە.
