گەشتا دهۆكێ ئاگرینە و زێدەتر پێنج ملیۆن دولار بۆ خەلاتان هاتینە تەرخانكرن
قەیس وەیس:
پشتی نەهـ سالێن ڤەقەتیانێ شەڤا دوشەمبیا بۆری ل پایتەختێ قەتەر دوحە رێورەسمێن پشككێشانا وەرزێ نوو یا كۆپا كەنداڤی ب پشكدارییا هەشت یانەیان هاتە ئەنجامدان، ئەوا دهێتە پێشبینیكرن هەڤڕكیێن وێ ل 24ێ چرییا ئێكێ یا بهێت هەتا 25ێ نیسانا سالا 2025ێ یا بەردەوامبیت، یانەیا دهۆك نوونەرا كوردستانێ و ئیراقێ د ئاستێ ئێكێ دا هاتبوو دانان، بڕیارە رۆژێن بهێت خشتەیێ یارییان بهێتە بەلاڤكرن.
د ڤێ پشككێشانێ دا ئەوا سەرۆكێ یانەیا دهۆك د. عەبدوللا جەلال بەرهەڤ بووی فیدارسیۆنا كەنداڤی رێنما و خەلاتێن قارەمانیێ دیاركرن، بڕیار هاتییە دان هەڤڕكیێن وێ ب شێوەیێ خول دو قۆناغ ب سیستەمێ یاریێن هاتن و چوون، هەشت یانە هاتنە بەلاڤكرن ل سەر دو كۆما و هەر كۆمەك دێ دو یانە دەربازبنە قۆناغا چارگۆشەیا زێرین، سەركەفتیێن وان دێ دەربازبنە یارییا دووماهیێ، پشتی پلەكرنی بۆ هاتییە دانان، پشتی پشككێشان بڤی شێویێ هاتە كرن.
كۆما ئێكێ دهۆك، نەسر یا ئیماراتی، زەفار یا عومانی، ئەهلی سەنعا یا یەمەنی.
كۆما دویێ: عەرەبی یا قەتەری، ئیتفاق یا سعۆدی، ریفاع یا بەحرێنی، قادسییە یا كوێتی.
یاریێن گەڕا ئێكێ یا تیما یانەیا دهۆكێ دێ بڤی شێوەیی بن،
دهۆك- نەسر یا ئیماراتی- ل یاریگەها یانەیا دهۆك
ئەهلی سەنعا- دهۆك ل یاریگەها ئەهلی ل وەلاتێ یەمەن
دهۆك- زەفار یا عەومانی- ل یاریگەها زەفار.
ل دۆر ڤێ یەكێ د. عەبدوللا جەلال سەرۆكێ یانەیا دهۆك گۆت: سۆپاسییا فدراسیۆنا كەنداڤی دكەین و حەمەد بن خەلیفە سەرۆكێ فدارسیۆنێ ب دانا رێورەسمێن ڤێ ئاهنگێ ب شێوەكێ جوان، هەروەسان دانانا خەلاتێن مەزن بۆ پشكداران و سەركەفتییان، داخازا سەركەفتنێ بۆ هەموو یانەیێن پشكدار دكەم، ل دووڤ پشككێشانێ یا دیارە هەموو یاریێن د كۆما مە دا ب زەحمەتن، دێ سەحكەینە یارییان ئێكێ، ئەم خودان جەماوەرەكێ مەزن یێ هەیی، هیڤیێن مە ئەوە سەركەفتنان بینن، پێنەڤێت دێ ل سەر هەر ئەنجامەكی ژی یێ رازیبین، بۆ یاریێن كۆپا كەنداڤی مە دەم یێ هەیی باشتر خوە بەرهەڤبكەین و زێدەتر یاریزان بهێنە دناڤ سەقایێ هەڤڕكییان دا ئەو یاریزانێن مە هەیین د ئاستەكێ بلند دانە و د باوەرێ دامە دێ هەڤڕكییەكا بهێز دگەل یانەیێن دی هەبیت.
جاسم ئەلرمێحی ئەمیندارێ گشتی یێ فدراسیۆنا كەنداڤی گۆت: پشتی نەهـ سالێن دووركەفتنێ بۆ وەرزێ ئەڤ سالە مە باشترین شێوە بەرهەڤی بۆ كۆپا كەنداڤی كریینە و بەلگەژی دانانا بوهاترین خەلات یێن پشكدار و سەركەفتیان بۆ هاتینە دانان كو دێ هەڤڕكییا خەلاتێن ماددی یێن فیدراسیۆنا ئاسیا و ئۆرۆپا دكەت و بڤی شێوەی.
قارەمانا كۆپا كەنداڤی دێ سێ ملیۆن دۆلاران وەرگریت.
خودانا رێزا دویێ دێ ئێك ملیۆن دۆلاران وەرگریت.
باشترین یاریزانێ كۆپا دێ 50 هزار دۆلاران وەرگریت.
باشترین گۆلپارێز دێ خەلاتێ 50 هزار دۆلاران وەرگریت.
گۆلكەرێ قارەمانیێ ژی دێ 50 هزار دۆلاران وەرگریت.
هەر یانەكا پشكدار دێ سێ هزار دۆلار بۆ هێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ- چارگۆشەیا زێرین- دێ 100 هزار دۆلار بۆ هێنە دان، دیسان ئەو یانەیا گەشتەكێ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ 30 هزار دۆلار بۆ هێنە تەرخانكرن، دیسان بۆ هەر یانەیەكا سەركەفتنێ بینت ژی 30 هزار دۆلار هاتینە دانان.
