هەر كەسەكێ كارتا نشتیمانی نەبیت مافێ وەرگرتنا ئاهێن خوارنێ نابیت
سندس سالح سلێڤانەیی:
نێزیكی سالەكێ یە ب بڕیارا وەزارەتا بازرگانیا ئیراقێ چێكرنا پلێتێن ئاهێن خوارنێ هاتیە راگرتن و رێڤەبەرێ رێكخستنا ئاهێن خوارنێ ل دهۆكێ دیاردكەت كو ل رۆژا 1/11 ل دووڤ سستەمەكێ نوو دێ دەستپێكەنە ڤە و هەر ولاتیەكێ كارتا نشتیمانی نەبیت مافێ وەرگرتنا ئاهێن خوارنێ نابیت.
حسێن سەبری، رێڤەبەرێ رێكخستنا پلێتێن ئاهێن خوارنێ ل پارێزگەها دهۆكێ بۆ رۆژناما ئەڤرۆ گۆت: راستە نێزیكی سالەكێ یە چێكرنا پلێتا ئاهێن خوارنێ بۆ وان كەسان نەهاتیە چێكرن یێن ژ نوو هەڤژینی پێكئیناین و ئەڤ چەندە ب بڕیارا وەزارەتا بازرگانیا عیراقێ بوویە، چونكو وان دڤیا ل دووف سستەمەكێ نوو ئاهێن خوارنێ بەلاڤ بكەن و بۆ ڤێ مەرەمێ د ئەڤ سالە دا ئەو كار ب دو كۆمپانیان هاتیە دان، لێ نەشیان سەركەفتنێ ب دەستڤە بینن و نوكە كۆمپانیەكا دی یا ل سەر وی پرۆژەی كار دكەت و ل بەرە ل دەستپێكا هەیڤا بهێت هندەك رێنمایێن نوو بگەهنە مە و جارەكا دی دەست ب چێكرنا وان پلێتان بهێتە كرن و ب بڕیارا وەزارەتا ناڤبڕی پشت بەستن ب تنێ دێ ل سەر (كارتا نشتیمانی) بیت و هەر وەلاتیەكێ ئەو كارت نەبیت مافێ وەرگرتنا ئاهێن خوارنێ نابیت.
رێڤەبەرێ رێكخستنا پلێتێن ئاهێن خوارنێ ل پارێزگەها دهۆكێ هێشتا گۆت: مە ل پارێزگەها دهۆكێ (280) هزار سەرۆك خێزان كو دبنە ملیونەك و (300) هزار كەس هەنە، ل سالا بۆری ئەرزاقێ شازدە هزار كەسان هاتبوو بڕین، لێ پشتی سەرەدانا مە كرین و مە بەرێ وان دایە جهێن شولەژێ و كارتا نشتیمانی چێكرین ئەرزاقێ وان زڤڕی ڤە، لەورا دخوازم هەموو سەرۆك خێزان ئەوێن هەتا نوكە كارتا نشتیمانی نەی بلەز بچن وێ كارتێ بۆ خوە چێكەن، چنكو ژ 1/11 وێڤە وان مافێ وەرگرتنا ئاهێن خوارنێ نابیت و ژ ئێدی وێڤە بۆ چێكرنا پلێتنا ئاهێن خوارنێ بتنێ دێ پشت بەستنێ ل سەر كارتا نشتیمانی كەن.
