ب بهایێ دو ملیار دیناران برنج هاتیە چاندن
ئامێدیێ، مەحمود نهێلی :
ئەندازیار عسمەت ئیبراهیم بەرپرسێ هوبا چاندنێ ل دێرەلۆكێ بۆ رۆژناما ئەڤرۆ گۆت: (دگەل وێ یەكێ كو چاندنا برنجی زەحمەت و رەنجەكا پتر ژ دەرامەتێن دتیر دڤێت، لێ ژ بەر كو مفایێن برنجێ كوردی باشترن ژ یێن بیانی و هەروەسا ژلایێ تام و خوەشیێ ڤە ژی ژ هەموو جورێن دیتر باشترە و چاندنا وی قازانجەكا باش تێدا هەیە بۆ جوتیاران و هەروەسا زەڤیێن چاندنێ ژی دهێنە پاقژكرن ژ بەر وێ یەكێ سال بۆ سالێ رێژا چاندنا برنجێ كوردی بەرڤ زێدەبوونێ یە.
ئاشكرا كر: هەر دوونەمەكا ئەردی ئەگەر ب رەنگەكێ باش بهێتە كرن، دێ دورێن دو تەنێن برنجی بەرهەم ئینیت و نوكە برنجێ كوردی ژی ل بازاری باشتر ژ یێ بیانی دهێـتە فرۆتن زێدەبار وێ یەكێ ب دەست خەلكی ناكەڤیت.
دەربارەی كاركرنا كرێكاران ل سەر زەڤیێن چاندنا برنجی ناڤهاتی خویاكر، بارا پترێ كاری ب رێك و ئالاڤێن دەستپێكی دهێتەكرن و پیشەسازیێن سەردەم و پێشكەفتی نەكەفتینە د خزمەتا جوتیارێ مەدا و كار ب زبارەیی ل دەڤەرێ دهێتە كرن و رۆژانە دەمێ چاندنێ و دەمێ درینێ ژی هەر زەڤیەكا برنجی 10 كرێكار تێدا كار دكەن و گۆت: بۆ جارا ئێكێ یە دەراسەكا درینا برنجی دهێتە دەڤەرێ و ئەڤ سالە خزمەتەكا باش یا جوتیاری كریە.
دیار ژی كر، ل سنورێ هۆبا چاندنا دێرەلۆك پتر ژ 1500 دونەمنێن ئەردی ب كێر چاندنا برنجی دهێن و ئەڤ سالە 600 دونەمێن ئەردی بۆ برنجی هاتینە چاندن و هەكە هەر دونەمەكی 1500 كێلویێن برنجی بەرهەم بینت و هەر ئێك كیلو ب 3000 دیناران بهێتە فرۆتن ئەڤە بەرهەمێ ئەڤ سالە ب تنێ دبیتە بهایی پتر ژ 2 ملیار دیناران.
