ب گرنگی دنێڕینە پێگەهێ هەرێما كوردستانێ
دوهی ئێكشەمبی 22/12/2024، نێچیرڤان بارزانی، سەرۆكێ هەرێما كوردستانێ پێشوازی ل گویدۆ كرۆسێتۆ، وەزیرێ بەرگرییا ئیتالیا كر.
د كۆمبوونێدا شێخ جەعفەر شێخ مستەفا، جێگرێ سەرۆكێ هەرێمێ و بالیۆزێ ئیتالیا ل ئیراقێ و هەژمارەك ژ بەرپرسێن هەردو ئالییان بەرهەڤ بوون، پەیوەندی و هاریكارییا هەڤپشك یا لەشكری و ئەمنی یا ئیتالیا ل گەل ئیراقێ و هەرێما كوردستانێ، پشتەڤانی و رۆلێ هێزێن ئیتالیا ل بەرهنگاربوونا تیرۆرێ، رەوشا ئیراقێ و هەرێما كوردستانێ و مەترسیێن دیاربوونا داعشێ، هاتنە گەنگەشەكرن.
نێچیرڤان بارزانی، سوپاسی و پێزانین بۆ پشتەڤانی و هاریكارییا ئیتالیا بۆ ئیراقێ و هەرێما كوردستانێ د هەموو واراندا هەبوو، ب تایبەتی د بەرهنگاربوونا تیرۆرێ و شكاندنا داعشێدا دوپاتكر، هەروەسا بەرهەڤی و خواستا هەرێما كوردستانێ بۆ زێدەتر پێشڤەبرنا هاریكارییا هەڤپشك و پاراستنا ئارامی و سەقامگیریێ ل دەڤەرێ دەربڕی.
وەزیرێ بەرگرییا ئیتالیا دوپاتكر كو وەلاتێ وی وەكو هەڤپشكەكێ گرنگ، ب گرنگی دنێریتە پەیوەندیێن خوە ل گەل ئیراقێ و هەرێما كوردستانێ، بۆ وێ چەندێ ژی د هەموو واراندا د پشتەڤانی و هاریكاریێن خوە دێ بەردەوام بیت، هەروەسا رۆلێ پێشمەرگەی د شەڕێ دژی تیرۆرێ و شكاندنا داعشێدا و رۆل و پێگەهێ هەرێما كوردستانێ ل دەڤەرێ بلند هەلسەنگاند.
هەردو ئالییان باس ل لڤین و بزاڤێن خوەرێكخستنا داعشێ كر و د هەڤڕابوون كو هێشتا مەترسییەكا راستەقینەیە و گەفە ل ئاسایش و سەقامگیرییا ئیراقێ و سووریێ و دەڤەرێ، لەوما بەردەوامییا پشتەڤانییا هەڤپەیمانییا نێڤدەولەتی بۆ ئیراقێ و هەرێما كوردستانێ، ب پێدڤی زانی، هەروەسا دوپاتی ل گرنگییا تێكهەلبوونا ئیراقێ ل كێشە و ئالۆزیێن دەڤەرێ، كر.
دوماهی پێشهاتێن رەوشا دەڤەرێ، ب تایبەتی گوهۆڕینێن سووریێ و كاریگەریێن وێ ل گەل چەند پرسێن جهێ گرنگییا هەڤپشك، تەوەرەكێ دی یێ كۆمبوونێ بوو.
