پێشوازیێ ل دەنگدانا جڤاتا نوونەرێن ئیراقێ د راستڤەكرنا بودجەی دا دكەین
سەرۆكێ حوكمەتا هەرێما كوردستانێ پێشوازی ل دەنگدانا جڤاتا نوونەرێن ئیراقێ ل سەر راستڤەكرنا قانوونا بودجەیا فیدرال كر و دەستخوەشی ل هەموو وان ئالییان كر یێن هاریكاری د سەرئێخستنا راستڤەكرنێدا كری.
مەسرور بارزانی، سەرۆكێ حوكمەتا هەرێما كوردستانێ ل تۆرا جڤاكییا (ئێكس) پەیامەك بەلاڤكر و تێدا گۆت» پێشوازیێ ل دەنگدانا جڤاتا نوونەرێن ئیراقێ ل سەر راستڤەكرنا قانوونا بودجەیا فیدرال دكەین و دەستخوەشیێ ل وان هەموو ئالییان دكەین یێن هاریكاری د سەرئێخستنا راستڤەكرنێدا كری».
سەرۆكێ حوكمەتا هەرێمێ دیاركر ژی» سوپاسییا تیما دانوستاندكارا حوكمەتا هەرێمێ ژی دكەین بۆ كاركرنێ ژ پێخەمەت دانانا میكانیزما چارەسەركرنا كێشەیا مووچەی».
هەروەسا گۆت» هیڤیدارین ئەڤ پێنگاڤا ئەرێنییا راستڤەكرنا قانوونا بودجەی، ببیتە دەستپێكەك بۆ چارەسەركرنا هەموو كێشەیێن دی و پێگیریبوونا حوكمەتا فیدرال ب هنارتنا مووچەی و شایستەیێن دارایی یێن هەرێما كوردستانێ».
