هیڤی یە قـانوونا بودجـەیێ ببیتـە ئەگـەرێ چـارەسەركـرنا كێشەیێن هـەلاویستی
دوهی سێشەمبی 4/2/2025، مەسرور بارزانی، سەرۆكێ حوكمەتا هەرێما كوردستانێ، ل گەل شاندێ دانوستاندكارێ حوكمەتا هەرێمێ ل گەل بەغدا كۆمبوو.
د بەیاننامەیەكا سەرۆكایەتییا حوكمەتێدا هاتیە” د كۆمبوونەكێدا شاندێ كورتییەك ل دۆر ئەنجامێن دانوستاندن و دیدارێن خوە ل بەغدا تایبەت ب راستڤەكرنا قانوونا بۆدجەیا گشتییا فیدرالی و دابینكرنا مووچە و شایستەیێن دارایی یێن هەرێما كوردستانێ بەرچاڤكر”.
سەرۆكێ حوكمەتا هەرێمێ سوپاسییا ئەندامێن شاندی و هەموو تیمێن تەكنیكی یێن حوكمەتا هەرێما كوردستانێ كر، كو گەلەك ب پیشەییانە و دلسۆزانە ئەركێن خوە بجهئینان. هیڤی ژی خواست دەنگدان ل سەر راستڤەكرنا قانوونا بۆدجەیا فیدرالی ببیتە ئەگەرێ چارەسەركرنا كێشەیێن هەلاویستی یێن دی د ناڤبەرا هەرێما كوردستانێ و حوكمەتا فیدرالدا.
