ڕەفتارا لەشكرێ ئیراقێ بەرانبەر جۆتیارێن كورد یا قەبوولكری نینە
سەرۆكایەتییا هەرێما كوردستانێ ل دۆر رەفتارا لەشكرێ ئیراقێ بەرانبەر جۆتیارێن كورد راگەهاند: ب تمامی رەفتارەكا رەتكریە و جهێ قەبوولكرنێ نینە.
سەبارەت وێ رەفتارا ژ ئالیێ هندەك ژ سەربازێن لەشكرێ ئیراقێ دژی جۆتیارێن كورد ل سنۆرێ كەركووكێ هاتیە كرن، دلشاد شەهاب، پەیڤدارێ سەرۆكایەتییا هەرێما كوردستانێ گۆت» سەرۆكایەتییا هەرێما كوردستانێ ژ نێزیك ل دووڤ وی بابەتی چوویە و داخواز ژ ئالیێن پەیوەندیدار یا كری پێرابوونێن پێدڤی بەرانبەر ئەنجامدەرێن وی كاری وەربگرن و رێكێ ل دوبارەبوونا وی بگرن».
پەیڤدارێ سەرۆكایەتییا هەرێمێ گۆت ژی» ئەڤ رەفتارە زیانێ دگەهیننە پێكڤەژیانێ و ئاشتییا جڤاكی و دڤێت هەموو ئالییەك وان جۆرە رەفتاران رەت بكەن وئەنجامدەرێن وان روو ب روویێ دادگەهێ بكەن».
