زێدەتر ژ چار ترلیۆن دیناران ژ بودجەیا ئیراقێ بۆ 70 گرۆپێن میلیشیایی دهێنە مەزاختن
نڤیسەر و رۆژنامەڤانەكێ ئیراقی یێ ناڤدار ل گۆشەیا خوە ل رۆژنامەیا (ئەلعەرەبی ئەلجەدید) یا لەندەنی، گۆتارەك سەبارەت دەولەتا میلیشیا ل ئیراقێ بەلاڤكر و تێدا دبێژیت» زێدەتر ژ 70 گرۆپێن میلیشیا ل سەر ئاخا ئیراقێ یێن هەین، مووچە و مەزاختیێن وان ل سەر بودجەیا گشتییا ئیراقێیە كو زێدەتر ژ چار ترلیۆن دینارانە، هەروەسا دیار دكەت كو میلیشیا شیانێن بێسنور د رەڤاندن و دەستەسەركرن و كوشتن و زیندانكرنا خەلكی دا یێن هەین.
عەبدوللتەتیف سەعدون، نڤیسەر و رۆژنامەڤانێ ئیراقی یێ ناڤدار د گۆتارەكێدا كو ل رۆژنامەیا (ئەلعەرەبی ئەلجەدید) یا لەندەنی بەلاڤكری، دبێژیت» ئیراق ئێك ژ وان وەلاتایە كو زوورترین دەستە و تاقم و گرۆپێن میلیشیا و لەشكرێن جودا د ناڤ ئاخا وێدا یێن هەین، هەر ژ 14 تەمووزا 1958 و هەتا نوكە ئیراقی ل سەر دەستێ میلیشیا ئازارێن مەزن دبینن و سڤكایەتی ب كەرامەتا وان دهێتە كرن».
ئەو نڤیسەرێ ئیراقی د گۆتارا خوە دا، باسێ دیرۆكا میلیشیێن ئیراقی ژ سالا 1958 هەتا سەردەمێ ئەڤرۆ دكەت و دبێژیت» هەر ژ میلیشیا (موقاوەما شەعبی) كو ل سالێن شێستاندا ژ چەرخێ بۆری ژ ئالیێ شیوعیێن ئیراقێ ڤە هاتیە دامەزراندن و (حەرەس قەومی) ل سەردەمێ حوكمڕانییا ئێكێ یا حزبا بەعس یا ژناڤچووی ل سالا 1963 و (جیش شەعبی) ل سەر دەمێ حوكمڕانییا دویێ یا حزبا بەعس ل سالا 1968 و ئەڤرۆ ژی (حەشدا شەعبی) كو پڕۆژەیەكێ ئیرانییە هاتیە دروستكرن، پاشی پڕۆژە قانوونەك هاتە پەسەندكرن كو خوەشگوزەرانی بۆ بالێن حەشدا شەعبی پەیداكر، ئەوژی ب رێكا تەرخانكرنا پشكەكێ ژ بودجەیا گشتییا ئیراقێ كو زێدەتر بوو ژ چار ترلیۆن دیناران بۆ حەشدا شەعبی. ڤێ چەندێ ژی وەكر ببیتە هێزەكا هەڤشێوەیێ لەشكرێ ئاسایی و هەتاكو بڕیاران ژی ژ فەرماندەیێ گشتیێ هێزێن چەكدار ل ئیراقێ وەناگریت، كو بڕیار بوو د بن سەرپەرشتییا وی دا بیت».
هەروەسا بەلاڤكر» زێدەتر ژ 70 دەستە وگرۆپ و تاقمێن میلیشیا یێن چەكدار ل سەر ئاخا ئیراقێ یێن هەین، كو هندەك ژ وان پەیوەندی ب لەشكرێ پاسدارێن ئیرانێ ڤە یا هەی و هندەكێن دی ژی پەیوەندی یا ب دەزگەهێ هەوالگیرییا ئیرانی ڤە هەی».
د پشكەكا دی یا گۆتارا خوە دا، وی نڤیسەرێ ئیراقی دیاركر» ئەڤ بەرپەرە ژی دێ چنە د ناڤ دیرۆكێدا، بەرۆڤاژی ئەو چەندا ئیراقییان دخواست ب دەستڤەبینن ژ ئاڤاكرنا دەولەتەكا مەدەنی و عەقلانی و دادپەروەر، كو رێز ل مرۆڤی بهێتە گرتن و كەرامەتا وی بهێتە پاراستن و ئازادیێ بۆ مسۆگەركر بكەت، بەلێ میلیشیاد ژیانا سیاسی و جڤاكیدا وەكر نەك تنێ بوو گەف ل سەر دەولەتێ و دەستهەلاتێ، بەلكو گەفن ل سەر ژیان و چارەنڤیسێ هەموو هەڤوەلاتیێن ئیراقی».
خویاكر ژی» میلیشیێن ئیراقی شیانێن بێسنۆر یێن هەین د رەڤاندن و دەستەسەركرن و كوشتن و دانانا زیندان و زیندانكرنا خەلكی و ڤەكرنا نڤیسینگەه و مالپەر و رۆژنامە و كەنالان كو ب ناڤێن وان د ئاخڤن و زانكۆ و قوتابخانە و رێكخراوێن رەوشەنبیری و جڤاكی ب ناڤێ ئایینی و نەتەوەی یێن دامەزراندین».
هەروەسا بەلاڤكر» میلیشیێن ئیراقی مافیایێن تاوانێن رێكخستینە، د كونترۆلكرنا لڤینێن ئابووری یێن وەلاتی و مفا وەرگرتن ژ دەرگەهێن سنۆری و فرۆكخانە و ئاسانكاری بۆ قەچاخچییا پەترۆلی ژ دەرڤەی كونترۆلا دەولەتێ و هەلگرتنا چەكی قەچاخچییا مادەیێن هۆشبەر و شوونواران و بازرگانیكرن ب مرۆڤی و دەستكاریكرن د بازارێ دۆلاریدا و سپیكرنا پارەی و یا ژ وێ مەترسیدارتر پەیوەندی ل گەل هێزەكا دەرەكیدا یا هەی و بزاڤێ دكەن بۆ وێ چەندێ ئەو هێزە بهێتە د ناڤخوە دا، بێی كو هیچ كەسەك چ هەڤوەلاتی یان بەرپرس بشێت دەنگێ نەرازیبوونێ بەرامبەر وی كاری بلند بكەت. هەكە كەسەك وێرەكیێ بدەتە خوە و دەنگێ خوە بلند بكەت، یان دێ میلیشیا بەرزەكەن، یان دێ كوژن، وەكو دەهان چالاكڤانێن سیاسی و میدیایی و ئەكادیمی و پیشەیی، كو ژ ئالیێ میلیشیانڤە هاتینە كوشتن».
