ئۆدەیا نشتەرگەرییێ
ناجح بێجانی
هەمی هیڤیێن وان ئەو بوون، ڕۆژەکێ ژ ڕۆژان بگەهن ئیکدو؛ ب بن خودان زاڕۆک و مالەکا ئاڤەدان، ئەڤە ژی وەکو خەونەکێ بوو، دڤیابا خەونێن وان یێن چەندین سالان بکن ڕاستی، پشتی هەردوکا دژییێ گەنجاتییێ دا هەڤدونیاسی وهەر چەندە مالێن وان نێزیکی ئێکبوون، ژبەرکولتۆر و داب ونەریتێن جڤاکی کو رێ پێ نەدا ب دروستاهی ئەوا ددلێ وان دا بۆ ئێکدو بێژن، لەومانێ پشتی چەندین سال سەر ڕا دەربازبوون، هێشتا یا ڤەشارتی مابوو، پێدڤی بوو هەر چو نەبت دەستپێشخەریەک هەبت ئەوا ددلێ واندا بۆ ئێکدو ڤەگێڕن و ئاستەنگ و گریکێن جڤاکی ڤەکن، خودێ کەرەم کر و دلێن وان ب ئێکدو شادبوون، بوونە خودان مالەکا ئاڤەدان و پری کەیف وخۆشی ئارام و بارێ قورسێ ژیانێ و دەست کورتی نە بوو ڕێگر ژ ئێکدو دوور بکەڤن، پشتی بۆرینا سالان ل سەر پێکئینانا هەڤژینێ و ل بەندا زاڕۆکەکێ نەخری بوون، کو ببتە فێقیێ ناڤ مالێ و سەبرێ خۆ پێ بینن و زێدەتر خۆشی ب سەر مالێ دابت و ڕۆژێن خوە ب کەیف و خۆشی پێکڤە ببۆرینن، پشتی هەڤژینا وی دوگیان دبت و دەست ب بەرهەڤییا دکن ژ وان پێدڤێن زاڕۆکی و چاڤەرێ ئەوێ ڕۆژێ بوون كو ب بن دایک و باب.. سۆزێ ددن هەگەر کوڕ بوو ناڤێ وی بکن ئازاد.. وئەگەر کچ بت ناڤێ وێ بکن ژیان. هەلبژارتنا ناڤا ژی هوکارێن خوە هەبوون (ئازاد) ئانکو گەهشتنە مرادا خۆ؛ ئازادبوون.. (ژیان) ژی بەردەوامییا ژیانێ، لێ ئەوا نەچاڤەڕێکری ڕوودا.. نشتەرگەرییەكا بلەز پێدڤی بوو ژ بلی یا زارۆكی؛ بارێ ژنێ سێچاریكی لێهات…نەچار بوون هەر چو نەبت بشێن گێانێ وێ قورتال بکن ژ نەخۆشییێ و بەری ژ دایکبوونا زاڕۆکێ. لێ بێ مفا بوو، قەدەرێ ژی هەر ئەڤە دڤییا، روحێن وان وەکو دو کۆترێن ئاشتێی بەرەف ئاسمانی فڕین.
