سێڤ و ئەقلێ ب ددان و لێڤ
خەلات محەمەد
چاڤێن وێ نە
نە ب دل.. دل ژ من بر
دلێ وێ یە
ب دل… دلێ من كول كر..
نە ژێ بۆ من بوو گول
و نە هێلا
ئەز دلێ خۆ بۆ خۆ ببم
ونە ژی بۆ خۆ بر دل.
هەوار بۆ كەسەرا چ رێك نە چنێ
بۆ روحا د مەلەكۆتێ مەزن دا
بەرزە و ب تنێ..
هەوار بۆ وێ سیبەرا
من هزركری ئارامییە
دەركەت رۆناهیبڕ..
زیندیبوونا من
ب قاچاخی ژ جانێ من ددزیت
و هێدی هێدی
وەك هەدارا دلەكی
چو تشت نەیی ل بەندێ بمینیت؛
هیڤیا من ب خۆ كڕ كر..
شەرق و غەربا تە نە ڤینناسە
لەو هەر ئاراستە
و بەرێ نە كەڤیت بەر پێن تە
ل بەر داسە..
تو ژی ب وێ جوانییا تێكدا سێڤ و خۆناڤی
و تژی دلێ من واسواسە..
چەپ و راستێ تە هەر چەپە
شانۆیە عشقا تە و دلێ من
دەپە..
ژ ئەزل ئالایێ عشقا تە
دكاكلكا روحا من دا ڕەپە
تو ژی سەردەبرا هۆشا ئەولی
لەو ژ هینگێ وەرە
یێن ب من دگەڤن ئەڤ درب و تەپە.
نە تو ژ سەردەبرنا خۆ پاشڤە دچی
نە ئەز ژ فێلبازیێن تو ل من دكەی
لێڤە دبم..!
مەزن نابن ئەم یێن زارۆك
ب هەمان چیرۆك
هەمان نفرەت
هەمان سوحبەت
هەمان دەركرن و تۆك
ما ئەگەر وەسا نەبیت
دێ چاوا خۆ دوبارە كەت دیرۆك؟!
