کاروانێ مە
ناجح بێجانی
کاروانێ مە ب ڕێکەفت، بەرەف وەلاتێ ڕۆژێ، پێنگاڤ – پێنگاڤ و چڕکە – چڕکە وێنە دبوون، دەنگێن لێدانێن دلێ من زێدە دبوون، کا دێ کەنگی گەهم.
تو بێژی سەروسیمایێن وێ هاتبنە گوهارتن، ترسا مەزن ئەوە ئەز ناس نەکم! پاشی بەرسڤ دێ چ بت؟
گەلۆ، پێدڤییە پسیارا ناڤونشانێ وێ بکم، یان ژی ئەو ب خوە دێ ئێتە بەرسینگێ من و خوە دتە نیاسین.. پشتی سلاڤەکا گەرم وەك عشقا من بۆ وێ و بخێرهاتنەکا نە د خەیالا مرۆڤاندا بۆ چەندین جاران دێ بەژنا خوە ژمن ڕا چەمینتن؟!
یان ئەڤا من گۆتی ب تنێ ل سەر کاغەزان و خەیالێن شاعێران كو ب چەند پەیڤێن خاپینۆك و دلخۆشکەر دهێنە نڤیسین دویر ژ کەتواری؟
ب ڕاستی، ئەو هەمی یا كو من هزردكری بەرەڤاژی بوون، ئەوا دهزرا مندا بەرەف ئاقارەکێ دیتر چوو.. وەختێ کاروانێ مە گەهشتی.. ئێكا دیتر ب هەمان ساخلەت و ئادگار، خوە دێ بێژی چاڤێن وێ نە، هەما دێ بێژی ئەو بخوەیە هاتە راستا من وگۆتە من: ئەڤە نە وارێ تەیە یێ کو دهزرا تەدا، بەلکو خەیالەك بوو، تەنها د مێشکێ خوەدا تە یێ وێنە كری. دەستێ من گرت و بەرێ من دا وبەرێ من دا ژۆرەكێ ل سەر دەرگەهێ وێ نڤیسی بوو(جیهانگیری – پشكا سڤكرنا بارێ خەریبیێ) و ئەز پالدام و گۆت: ل دەستپێكێ هەر ژۆر دا دگەل قۆناغا نوی بگونجی و پاشی وەرە دا چیڕۆکێ ب دروستاهی و راستگۆیانە ژ تەرا ڤەگێرم.ب ڕاستی تووشی ترس و بێئۆمێدێ ب هەڤڕا بووم، لێ دیسان دڤێتین مرۆڤ یێ خۆڕاگر بت.
