نامەیەک ژ چویچکەکا بەهەشتێ بۆ دڕندەیێن ئەردی
جۆتیار بانی
دەما ئەم زارۆک، ل زەمانێ مە، هاتنوچوون ب دەوار و ماهینان بوو. خوەشی هەر ئەو بوو، گاڤا ب هەڤ دایکا خوە سواری پشتێن دەواران دبووین، بابێ من ژی هەردەم ل کێریان، هەڤالتییا ئەلهۆ و بازێن چیا دکر، ئەو دووری مە بوو. لێ مە بهیست بوو، ئامیرەکێ سوارکرنێ دەرکەڤتییە، سواربوونا وێ خوەشترە ژ سواربوونا دەواران، ل سەر چار بازنان دمەشیت، کەسەک ل پێشاهییا وێ دڕۆنیت، فەرمانا هاتنوچوونا وێ دکەت. من مەرەق دکر جارەکێ لێ سواربم و بەرەف وارێ بابێ خوە بچم.
خودێ هێڤییا من بجھ ئینا، ڕۆژەکێ ئەڤ ئامیرە هاتە ناڤ گوندێ مە، بەدەنێ وێ ژ چێکرنا ئاسنی بوو، گەلەکا مەزن و زەبەلاح بوو، جهێ مە گۆندیان هەمییان تێدا دکر. هندەک هاتن ئەم داخواز کرین سواری پاشییا وێ ببین، سەرباری ناڤچاڤێن کرێت یێن وان، کەیفا من ڕانەوستییا و من بزاڤ کر سوار ببم. دایکا من ملێن من گرتن و بوو ڕێگرا چوونا من، قێژیێن وێ پەردەیێن گوهێن من پەڕتاندن دەما دگۆتە داخوازکەری: (ئەم ناهێین، دێ ل ڤێرە مینین، سواربوونا دەوارێن مە ژ ئامیرەیێن هەوە خوەشترە). لێ داخوازکەر یێ ڕژد بوو و ملێن دایکا من ب زۆری گرتن و هاڤێژتە د پاشییا ڤی ئامیرەیدا ئەوا پڕ ژ گوندیێن مە، هەڤالێن من ژی هەمی تێدا بوون.
ئەڤ ئامێرە کەفتە رێکێ و ئەم ژ توخیبێ گوندی دەرکەڤتین. مە زارۆکان دڤییا دەربڕینێ ژ خوەشییا ڤی ئامیرەی بکەین، لێ قێژی و هەواریان چ خوەشی د گەشتا مەدا نەهێلا. مەودایەکا دوور ئەم چووین. دەما چیا نەماین و دەڤەر بوویە دەشت، ئەز تێکچووم، من زانی ئەڤە بەرەف وارێ بابێ من ناچن. درێژاهییا دەمێ، ئەم برسی و تێهنی کرین. بێ وژدانییا ڕۆژێ ژی ئەم ب ئاسنێ ڤی ئامیرەی ڤە کەواندین. ژ نشکەکێ ڤە ئامیرە ژ کار کەڤت، دناڤ بیابانەکێ هاتە ڕاوەستاندن، ل ڤێ دەڤەرێ، ژ تۆزێ زێدەتر چ دی نەبوو. ما چ جهێن دی نەبوون گەشتا مە ببەنێ، هەما بلا سواربوونا دەوارێن ل ناڤ چیایێن مەبان، چێتربوو ژ ڤی ئامیرەیێ کەواندی. ژخوە ئەڤە خوارنێ ژی نادەنە مە، دایکا من چ خوارن ل گەل خوە نەئینایە، دیارە هزر دکر دێ ئەڤانە خوارنێ دەنە مە. ئەوا من بهیستی و دیتی؛ دەنگێن قێژیان و باهۆزێن تۆزێ ب هەڤ دەنگێ گۆلەیان؛ گەشتا مە فهێت کر، ئێدی من های ژ خوە نەما، ژ بێزارییێ ئەز کەفتمە د خەوەکا گراندا.
دەمێ چاڤێن من ڤەبووین، لاشێ من سڤک بووبوو، ئەز ل بلنداهییێن ئەسمانی هەست ب فڕینێ دکەم. من هێڤکرە ل ژێر خوە، دایکا من یا د ناڤ ڕەنگێ سۆردا کەفتییە هەزار خەوان، تو بخودێ کە دایێ، ما ڤێرە جهێ خەوێ یە تو نڤستی!، زارۆیەک ژی ل بەر سینگی ئارام نڤستییە. نەعالا وێ وەکو یا منە، لێ نوکە ئەز یێ پێخاسم، ما خوەنە ئەو ئەزم؟!
