ئەو دەرگەهێن ڤەبووین و تێدا دەرباز نەبووی
سالح دۆسكی
ئاخ
سێسەد و شێست و پێنج گول
ژ سێسەد و شێست و پێنج وارێن جودا
كرن
ب رێكێن زانستی هەلگرتن
ب چاڤدێری خودانكرن
دا باخچەكێ پێ ئاڤا بكەت
لێ هەر نەشیا
ئاخا وی نە یا گولانە.
خەریبی
دنیا هەمی تێكڤەدا
سرۆشتێن وەكی بەهەشتێ
دیمەنێن ئەڤێ گەشتێ
ل داوییێ زانی چەندە فەرە
ڤەگەڕیان.. و
كۆلكێ وی یێ ل بنی گوندی
ژ هەمیان ب گەرم و ب تێنترە
لێ نە خۆشترە.
هەڤدژی
د ئەڤینییێ دا نە مەلەڤان
چەند گەتبا دەریا دو چاڤێن جوان
دخەندقی و دبوو قوربان
لەورا برایار دا
گۆڕەپانا عشقا خۆ
ڤەگوهێزتە جهەكی بیابان.
پەشێمانی
پشتی حەفتێ سالییێ
نێزیكی دەرگەهێ كالییێ
ژ نوی زانی
دەردێ مەحرۆمییێ
قەبارەیێ ڤالاهییێ
دەبازبوو تەمەنێ گەنجاتییێ
بێ ئەڤین… بێ ژڤان
بێ جۆش وخۆشی
بێ خان و مان
و هەدركرنا كێلێكێن جوان
ژ بنێ دلی گری
ژبۆ ئەو خۆشیێن نە كرین و
دەست د چووییێ.
