دزیكەرێ رۆژا شەمبیێ
نڤیسین: گابرێل ماركیز
(ئۆگو) دزیكەرە و بتنێ ل دووماھیا ھەمی حەفتیان، دزیان دكەت. شەڤا شەمبیەكێ چوو د مالەكێڤە و (ئانا)یا دژیێ خوە یێ سیھـ سالیێدا و ھەر شەڤ دمینتە ھشیار، ب تاوانا ویڤە گرت. پشتی گەفێن دەمانجێ لێ كرین، زێڕوزینەتێ خوە رادەستی وی كرن، ھیڤی ژێ خواستن خوە نزیكی (باولی) كچا وێ یا سێ سالی نەكەت. (ئۆگو)ی ھزرێن خوەكرن: “ئەز بۆچی زوی دەربكەڤم، ددەمەكیدا بارودوخ لڤێرە باشە؟”.
ئەو دشێت بێھنڤەدانا حەفتیێ ھەمیێ لڤێرە ب سەر ببەت و خۆشیێ ژ ھەر تشتی وەربگریت، ژبەركو ھەڤژین چوو ئێڤارا ئێكشەمبیێ ژ گەشتا خوە ڤەگەڕیت و ئەو ڤێ چەندێ باش دزانیت، پشتی سیخوری ل سەر وان كری. دزیكەر گەلەك ب ھزركرنێڤە نەما: جلوبەرگێن ھەڤژینی ل بەر خوەكرن و ژ (ئانا)یێ داخوازكر خوارنەكێ بۆ لێنیت و مەیێ ژ سەردابێ بۆ بینیت و كاسێتەكا مۆزیكێ د بەر خوارنێ را دانیتە سەر، لدەف وی ژیانا بێ مۆزیك نابیت.
ھزرا (ئانا)یێ ل سەر كچا وێ باولی بوو، دەما دانەكێ شیڤێ بەرھەڤدكر و ھزرەك بۆ ھات خوە ژ ڤی مرۆڤی رزگار بكەت. لێ نەدشیا گەلەك تشتان بكەت، (ئۆگو)ی تێلێن تەلەفۆنێ بڕیبوون و خانی ژی یێ ڤەدەرە و دەم شەڤ بوو و كەسەك ناھێت. (ئانا)یێ بریاردا، حەبەكا نڤستنێ بكەتە دناڤ كۆپێ (ئۆگوی)دا. د شیڤخورانێدا بۆ دزیكەرێ ئاشكەرا بوو، كو ئەو ل رۆژێن حەفتیێ زێرەڤانێ ئێك ژ بانكانە و (ئانا) پێشكێشكارا بەرنامەكێ مۆزیكەكا مللی یە و بێ ڤەقەتیان ھەر شەڤ ئەو گوھداریا وێ دكەت. ئەو ئێك ژ ھەرە داخبارێن وێیە و دەما وان گوھداریا (بینی) دكر و وی سترانا (Cmo fue) دگۆت، بەحسا مۆزیكی و مۆزیكڤانان كرن. (ئانا) پەشیمان بوو كو ئەو نڤاندی، ددەمەكیدا ئەو ل سەر خوە رەفتارێ دكەت و د نیەتا ویدا نینە ئەو وێ ئازار بدەت یان ھێرشی وێ بكەت. لێ بۆری و حەب یا د كۆپێ ویدا و دزیكەری ھەمی یا ڤەخواری و یێ د كۆپیتكا خۆشیێدا. دگەل ڤێ چەندێ، شاشیەك یا دروستبووی، كەسێ كۆپ ڤەخاری ھەر ئەو بخوە بوو و ھەر زوی كەتە د خەوێدا.
ل رۆژا دیفرا (ئانا) ژ خەو رابوو و جلوبەرگێن وێ ھەمی یێ ل بەر و لحێف یا ب سەردادایە و یا دژۆرا خوەڤە. ل ناڤ باخچەی (ئۆگو) و (باولی) یێ یاریان دكەن، ئەڤە پشتی تێشت ژی بەھەڤكری. (ئانا) ژڤی دیمەنی حێبەتی ما و ئەو پێكڤە د گونجاینە، دیسان شێوازێ لێنانێ یێ ڤی دزیكەری، گەلەك یێ سەرنجراكێش بوو. (ئانا)یێ ھەست ب خۆشیەكا نە ئاسایی كر. د وان چركاندا، ئێك ژ ھەڤالێن وێ ئەو داخوازی فراڤینێ كر. (ئۆگو) دلگران بوو و لێ (ئانا)یێ ھەر زوی ئەڤ داخوازیە رەتكر، ب بەھانا نەساخیێ و ھوسا ھەر سێ مانە د خانیڤە و خۆشی ب بێھنڤەدانا رۆژا ئێك شەمبیێ برن.
(ئۆگو)ی فیتك دبەر چاككرنا پەنجەرەیان را ڤەددان و ئەو یێ تێلێن تەلەفۆنێ د گەھینتە ئێك، ئەوێن وی شەڤا بەری وێ بڕین. (ئانا)یێ تێ ئینادەر كو ئەو سەمایا (دانسون) باش دزانیت و ئەو خۆشترین سەما یا وێ بوو و لێ ئەو نەدشیا وێ سەمایێ دگەل چ كەسەكێ بكەت. بۆ پێشنیار كر ئەو پێكڤە ڤێ سەمایێ بكەن و تا بوویە ئێڤار، ئەو دگەل ڤێ سەمایێ مان. (باولی) ژی چاڤدێریا وان دكر و دەست بۆ دقوتان و ل دووماھیێ نڤست. پشتی ھەردو سەماكەر ماندیبووین، خوە ل سەر ئێك ژ قەنەفەیێن ژۆرێ درێژكر. دڤان چركەیاندا وان چ نەبوو بێژنە ئێك، تا ژبیركربوو كو دەمێ ھاتنا ھەڤژینی یە. (ئۆگو)ی زێڕوزینەتێن وێ بۆ زڤراندن، سەرەرای دگۆتێ نەزڤرینە..هەر وەسا ھندەك شیرەت ژی دانێ تا جارەكا دی دزیكەر نەشێن خوە بكێشنە د خانیێ وێڤە و ب دلگرانی خاترا خوە ژ ڤێ ژنێ و كچا وێ خواست.
(ئانا)یێ بەرێخوە ددایێ دەمێ ئەو دویر دكەڤت. بەری ژبەر چاڤێن وێ بەرزە بیت، ب ھەمی دەنگێ خوە گازیكرێ و د زڤرینێدا گۆتێ، ھەڤژینێ وێ دێ دوبارە ددوماھیا حەفتیا بھێتدا گەشتێ كەتەڤە.. ب دلخۆشی ل شوین پێن خوە زڤریڤە و ب سەما جادەیێن تاخی دەرباز دكرن و شەڤێ ژی دەست بخوە ڤەكێشانێ دكر.
ــــــــــــــــــــــ
دزیكەرێ رۆژا شەمبیێ One Day After Saturday، ناڤێ ئێك ژ كورتەچیڕۆكێن (گابرێل ماركیز)ە و شیایە خەلاتێ ئێكەتیا ھونەرمەندێن كولومبی ب دەستڤە بینیت و ئەڤە دبیتە ئێكەم خەلاتێ وی یێ ئەدەبی و ئەڤ چیڕۆكە ژ ئالیێ (تەوفیق بوركی) ھاتیە عەرەبیكرن.
