گۆڕەک هاڤی
گرین نازی عەبدولباقی
ب برینەکا ب خوینا ئازادیێ تافیلبوویی
من
دەست دا قەلەمێ خۆ
ئەوێ شوینا حبری تژی ژەنگ
هەروەکی ئێدی
تاڤ
پەنجەرەیا ژۆرا منا سێوی نا خۆت
ئەز ژی
خۆ ب هەمبێزا دایکینییا بارانێ دخاپینم
ئەز
داڤەکا هیڤییان
ژ پۆڕا بێهیڤیبوونێ ل خۆ دئالینم
هێی هێی..!
تو د هەبوونێ دا و ئەز تە ب تبلێن خۆ دبینم
هەستێن کاڤلبوویی دکەمە پەیڤ و
د گەردەنا هەلبەستێن خۆڤە دئاڤینم
هەلبەستەک
مینا بەلاتینکەک دوور وار
یان ژی
مینا گورگەک خودان کێلبێن وەستیایی و ژار
تنێ هەلبەستەکە
بەلاتینک و گورگەکی
د هەمبێزا تنێبوونێ دا لێک عاشق بکەت
گۆرگ دێ چیڕۆكێن خوینێ بێژیت
بەلێ ما بەلاتینكێ ژ بلی چیرۆكێن گولان
چ تشتێن دی هەنە؟
ئەز ئەڤرۆ مشەختی مە
کۆچکرییا گۆڕەکێ هاڤی مە
مینا کەڤالەکێ تژی سەر تۆزم
کەڤالەک کو ..
د زیندانێ دا سترانێن ئازادییێ دگۆتن
مری د گۆڕێ تاری دا رادبوون
هندەکان
گونەهێن خۆ ڕادئێخستن
هندەکان ژی
گونەهێن خۆ دفرۆتن
جاران ژی
خودانێن مرییان
کفنێن مرییێن خۆ ددڕاندن
تژی وێرێ پارچەیێن دڕیای یێن كفنانە
ئەز
دهێم شار ب شار
گۆڕ ب گۆڕ و وار ب وار
لێ ئێدی دەست دگرتینە
مینا مێژوونڤیسەک بێ خامە
نە چارەنڤیس دشێت و
نە ژی قەدەر دهێت
ژ چاڤان ڤەبن
نە دیمەن ماینە، نەژی ڕەنگ
نە ئارامی مایە، نە ژی دەنگ
ئێدی چ کەرنەڤال
مینا چکچکا دەمژمێرا
سپێدەهییا سێدارەبوویەکێ
من ڕەنگین ناکەن
ئێدی زمان
مینا هەوارەکا بێ دەنگ
مت و لال دبیت
پەیڤ ژ بیردانکا من
هێدی هێدی تژی و ڤالا دبیت
هەتا خامەیێ من ژی
ژ کلێ چاڤێ خۆ زیز دبیت
ئەی گۆڕێن خودان کفنسپی
ب گۆڕەکێ کفنڕەشڤە
دێ بمە مێهڤانا شەڤێن نەچاڤەرێکری
هیڤی دکەم
ل من نە بنە خۆزییەک
زکێ خۆ ژ بێهیڤیبوونێ تێرکری
کنف نینن ئەو داڤێن پرچا منن
ئەڤ گەردەنە تژی کری
دەم هات ئەو داڤە
دەست ب وێ گۆتنێ بکەن یا دگۆت:
«ئەی خودایێ من،
گەر رەشەبایێ ڤێ ژیانێ کفنێ من ڕەش بکەت
من ببە لایێ خۆ».
