شانۆگەریەكا شاریایی
سالح دۆسكی
ل سەر دەپێ شانۆیێ
سێ ئەكتەر
سێ روودانێن فەر
سێ رەنگێن رۆناهییێ
ل سێ قورنەتا
ول یا چارێ
ب رەوشێ دكەنی دەرهێنەر.
ل سەر دەپێ شانۆیێ
تژی (ئەم) ین
ژ دەرڤەیی جیهانا خۆ دژین
نە بۆ خۆ دكەنین
نە بۆ خۆ دگرین.
ل سەر دەپێ شانۆیێ
ماسك رەوانە
درەو رەهوانە
لێ راستییا بێگۆمان
خاپاندیێ دلبژان
ڤەبڕ تەماشەڤانە.
ل سەر دەپێ شانۆیێ
دوهی و ئەڤرۆ و سوباهی
دئێك دیمەنی دا چارچۆڤەكرینە
دیمەنەكی بێ دووماهی
هندی دوبارە دبوو
ل جهەكی دی دگەڕیا
بێزا ببوو ل وی جهی.
ل سەر دەپێ شانۆیێ
مە خۆ دیت زارڤەكەرێن ب شیان
رۆلێن راست مە گێڕان
وەك وژدانا كەڤییێ بەفرێ
لەو شانۆگەری ب رێڤەچوو
بێ تەماشەڤان.
ل سەر دەپێ شانۆیێ
قارەمان هەمی مرن
ستەمكارا زۆری كرن
گوند و زەڤی پێكڤە سوتن
باژێر ژ گەنجا ڤالا كرن
ل بیابانا بنئاخكرن
لێ هندەك مان
خۆ قورتال كرن
لەو ئەڤ سەرێ هندە سالە
شانۆگەری ب دوای هاتی
وهێژ پەردە
نەهاتە گرتن.
