پاپۆڕا ئاسمانی
نزار عیسا نوردینی
پیرەمێرەک ب شاشکا خۆ یا ره‌ش و سپی و گۆپالێ خۆ یێ ژ دار به‌رویێ، ل بن چیای راوه‌ستیابوو. ل ژێر د ناڤ گه‌لیدا، گوندێ ئەوی وه‌ک کۆمه‌کا به‌فرانکێن به‌ردایی د خه‌وه‌کا خۆشدا بوو. بەلێ گیانێ ئەوی یێ پیر، وه‌ک چیایێ ل به‌رامبه‌ر ئەوی، تژی ژ نهێنی و چیڕۆکان بوو، ئه‌ڤرۆ ئه‌و هاتبوو داکو سه‌ره‌دانا بلنداهییان بکه‌ت. ل پێشییا ئەوی، قه‌فه‌سەکا پۆلایی کو ب تێلێن ستویر هاتبوو گرێدان، راوه‌ستیابوو. بتنێ ئامیره‌ک نەبوو، به‌لکو پاپۆرەک بوو، کو مرۆڤ ژ که‌نارێ ژیانا ڕۆژانه هه‌لدگرتن و بەرەڤ ده‌ریایه‌کا بێده‌نگ یا ئاسمانی دبرن.
ده‌مێ ب هێمنی چوویە ژۆرڤە، ده‌رگه‌هـ ل دویڤ هاته گرتن و ئه‌و ژ جیهانێ هاته دابڕین. ب له‌رزەکا نه‌رم وه‌ک لێدانا دله‌کێ نوی بوو، پاپۆرا ئەوی یا بچویک ده‌ست ب گه‌شتا خۆ کر. ئه‌و بلندبوونه‌ک نەبوو، به‌لکو ژێکڤه‌بوون بوو. هێدی هێدی، دارێن چیای، یێن کو د سالێن درێژ دا ببوونە هه‌ڤالێن ئەوی، وه‌ک نهالێن بچویک بوون و ئه‌و ڕێکا ئەڤرازی یا کو هه‌ر ڕۆژ تێرا دچوو و دهات، ببوو خه‌ته‌کا خوار یا کو ب تیرا خه‌مێ هاتبیتە کێشان. ژ په‌نجه‌رەیا شویشه‌ی، پیرەمێری سه‌حکرە گیانێ خۆ ل خوارێ مایه.
ل وێرێ د ناڤ ئەوی دیمه‌نیدا، جوانییا خۆ یا ژ ده‌ستچوویی ددیت، هێزا خۆیا به‌رێ و ڕوندکێن خۆ یێن کو ب سه‌ر ئەوێ ئاخێدا باراندبوون. پاپۆرا ئاسمانی ئه‌و بلندتر دکر، ئێدی ده‌نگێ بای نەبوو و نه ژی یێ ژیانێ. بێده‌نگییه‌کا پیرۆز بوو، بێده‌نگییا کو د ناڤبه‌را لێدانێن دلێ مرۆڤی و سترانا ئه‌به‌دییه‌تێدا هه‌ی. ئه‌و د ناڤ شیناهییه‌کا بێ دویماهیدا هه‌لاویستی بوو، نه ل سه‌ر عه‌ردی و نه ژی دگه‌ل ئاسمانی. گیانه‌ک بوو د به‌رزه‌خا بیرهاتناندا. دەمێ گه‌هشتییە كۆپیتكێ، راوه‌ستانا ئەوی وه‌ک بێهنڤه‌دانه‌کا خۆش بوو پشتی گه‌شته‌کا درێژ. ده‌رگه‌هـ ڤه‌بوو و بایه‌کێ سار و تیژ، کو بێهنا به‌فرێن ڤه‌شارتی و ئازادییێ ژێ دهات، ل روویێ ئەوی ددا. ئه‌و ژ پاپۆرا خوه یا بچویک ده‌رکه‌فت و ل سه‌ر كۆپیتكا جیهانێ راوه‌ستییا.
ل وێرێ، د ئەوێ بێده‌نگییا مه‌زناهیدا، ئەو تێگه‌هشت، کو ئه‌ڤ گه‌شته بتنێ بلندبوونه‌کا ب سه‌ر چیاییدا نەبوو، به‌لکو سه‌فه‌ره‌ک د ناڤ گیانێ ئەوی ب خۆ دا بوو. ئەوی ژیانا خۆ ژ بلنداهییه‌کێ دیت بوو و د نوکەدا هه‌می تشت پاقژتر و ب ڕامانتر دیار دکرن. تێگه‌هشت کو هنده‌ک جاران، دڤێت مرۆڤ ب خۆ جیهانێ بلند بکه‌ت داکو بشێت جوانییا ئەوێ ببینیت.
