ئەو ڕۆندکێن خوە د ناڤ بهارەکا ڕەنگاوڕەنگ دا ڤەشارتین
عیسا عەبدولڕەحمان مستەفا
د گەلییەکێ بێدەنگ و بێ پێژندا، ئەز چوومە خواری کاملانا بهارێیە، گییا بەژنەکێ یێ بلندبووی و کۆلیلکێن ڕەنگاوڕەنگ یێن ململانێ دکەن، هەر ئێک دبێژیتە یا دی وێڤە هەرە، ئــــــەڤ بهارە بتنێ بەهرا منە.
ڕەنگ و بێهنێن ئەڤێ بهارێ ئەز دلخوەشکربووم و دبن بارێ ئەڤێ خوەشییا هندا مەزن من گۆت؛ خوەزی ئەز ئێک ژ ئەڤان پەلاتینکان بام، دا ژ ئەڤێ گولێ فڕیبام و چووبام ل سەر پەڕێن گولا هەنێ.
ژنشکەکێڤە چاڤێن من ب تشتەکێ ڕەش کەڤت و دناڤ قەفتەکا نێرگزاندا بوو، پیچەک ئەز ب نک ڤە چووم و من زانی کو پیرەژنەکە یا دناڤ ئەوان نێرگزاندا ڕوینشتی، هەر بێهن خوە دچەماند و هەتا سەرێ ئەوێ دناڤ نێرگز و گیایدا بەرزەدبوو و پاشی دا وێڤەترچیت و دیسا سەرێ خوە چەمینیتە دناڤ نێرگزاندا و ماچی دکرن و بێهن دکری.
ئەز ل سەر گڤاندەکی ڕوینشتم ژ هێرڤەی ئەوێ و من دڤییا ببینم کا ئەڤ پیرەژنە دێ چ کت. بێهنەک پێڤە چوو من دیت جارەکا دی ڕابوو و چار جارا سەرێ ئەوێ دناڤ نێرگزاندا بەرزەبوو. زڤڕی و ب ڕەخ منڤە هات و وەکی نێزیکی من بووی، من دیت چاڤێن ئەوێ تژی ڕۆندکن و ڕویێن ئەوێ د شلن ژ ڕۆندکان، دناڤ ڕۆندکاندا بەرێ خوە دا من و بێی کو دەین کت.
د بەر منڕا چوو و ئەز مامە حێبەتی! ئەرێ بۆچ ل ئەڤێ ڕۆژا هندا خوەش و دناڤ ئەڤێ جیهانا کولیلکاندا ئەڤ سەرسپییە دکتە گری؟ ئەز نەشییام و من قەستا جهێ ئەو لێ ڕوینشتی کر، من دیت چار گۆڕ یێن ب ڕەخ ئێکڤە ڕێزکرینە، ب ناڤێ ‹›مەبەست، ئازا، مەرد و دارا» و نێرگز یێن ل سەر مەخەل بووین وهێژ ڕۆندکێن پیرێ یێن ب هەر چار کێلییێن ئەوانڤە و دەمێ ئەز ل دۆر خوە زڤڕیم دا سەحکمە ئەوی ئالییێ پیرەژن بۆ چووی، ڕۆندکان نەهێلان ئەز چ تشتان ببینم.
