دەرگەهێ ژبیرکری
ئەڤراز حامد نسری
د گەنجاتیا خۆ دا وێنەکێشەکێ خودان بەهرە بوو. تابلۆیێن وی ژ ژیان و ڕەنگان دپڕ بوون. لێ ڕۆژەکێ، پشتی گه‌نگه‌شه‌یه‌كا بێ ڕامان دگەل هەڤالێ وی یێ هەرە نێزیک کو ئەو ژی هونەرمەند بوو، وی ب كه‌رب و کین فڕچه‌یێ خۆ هاڤێت و سۆیند خوار کو ئێدی دەستێ خۆ نەكەتە ڕەنگان. ب بۆرینا سالان، کلیلا وێ ژۆرێ د ناڤ تۆزا ژبیرکرنێ دا وندا بوو.
هەمی ڕۆژا د پەنجەرێ ڕا تەماشه‌ی ژیانا خەلکی دکر و هەست ب ڤالاتیەکا مەزن دکر. گەلەک جاران هزرا ڤەکرنا وی دەرگەهی دکر، لێ هەر جارێ دەنگەکی د ناخێ وی دا دگۆت: درەنگە.. ئێدی تە ئەو شیان نینن!
ڕۆژەکێ، نەڤیێ وی یێ بچووک، ئازاد، ب چەند قەلەم ڕەنگێن شکەستی و کاغەزەکا قرێژی ڤە هاتە دەف، وی وێنەیەکێ سادە یێ چیای کێشابو و ب کەیف نیشا باپیرێ خۆ دا. چاڤێن مام سلێمانی ژ ڕوندکان تژی بوون. وی د وێنەیێ سادە یێ ئازادی دا، ئەو حەژێکرنا بێ مەرج دیت یا کو وی بخۆ ژی جارەکێ هەبوو.
وی ڕۆژێ، مام سلێمان ڕابوو و چوو بەرەڤ ژۆرا ژبیرکری. پشتی گەڕیانەکا درێژ، وی کلیلا ژەنگی د قولاچه‌كا کەڤن دا دیت. دەمێ وی کلیل ئێخستییە قفلا دەرگەهی و زڤڕاندی، دەنگێ قرچەقرێچەکێ هات کو وەکو نەعلەتەکا سالێن بۆری بوو.
دەرگەهـ ڤەبوو. تۆز د هەوای دا دڕەقسی، و بێهنا ڕەنگێن هشک و دارێ کەڤنار هەمی جهـ گرتن. ل سەر ستاندی، تابلۆیەکێ نیڤه‌رۆ مابوو، هەمان ئەو تابلۆیێ بوویە ئەگەرێ گه‌نگه‌شا وی و ڕەشیدی.
پشتی نیڤرۆ، وی جامانەکا بچووک یا شریناهیێ هەلگرت و بەرێ خۆ دا مالا ڕەشیدی. دەمێ ڕەشیدێ پیر دەرگەهـ ڤەکری و سلێمان دیتی، بێدەنگیەکا درێژ کەفتە د ناڤبەرا وان دا. پاشی، ڕەشیدی ب گڕنژینەکا ب ئێش گۆت: من گەلەک چاڤەرێ تە کر، هەڤال.
وێ ڕۆژێ، وان هەتا ئێڤاری پێکڤە دەرباز کر، نە ب ئاخڤتنێن زۆر، بەلکو ب هەستکرنا لێبۆرین و هەڤالینیێ.
ل دوماهیێ، دەمێ مام سلێمان دزڤڕی مال، وی تەماشه‌ی دەرگەهێ ڤەکری یێ ژۆرا خۆ کر و د دلێ خۆ دا گۆت: ڕاستە، چ جارا بۆ ڤەکرنا دەرگەهەکی درەنگ نینە.. لێ خودایۆ، من چەند حەز دکر من ئەڤ دەرگەهە سیهـ سالا بەری نوكه ڤەکربا.
وی زانی کو ئەو سالێن بۆری ناڤەگەڕن، لێ ئەو سالێن داهاتی دشێن پڕ بن ژ ڕەنگ و هەڤالینی و ژیانێ. و ژ وێ ڕۆژێ و پێڤە، دەرگەهێ ژۆرا وی چ جاران نەهاتە گرتن.
