پـاس
عەبدلڕحمان بامەرنی
ترۆمبێلا وی ژ كاركەفت بوو، ھۆسا بەرسڤا ئەڤێ ل بەر سینگا خوە دا و دڤیا بۆ دیاربكەت، سویاربوونا وی ل ڤێ پاسێ تشتەكێ نوی و دەمكییە. ئەڤێ بەرسڤێ نەشییا چو پرسیارێن دی ل دەف یێ پسیار كری دورست بكەت و خوە ب مۆبایلا خوە ڤە مژوول كر. ھەر كەسێ ل ڤێ پاسێ سویار بیت و ل نەفەرێن وێ بنێریت، ھەردو كەسان ملێن وان یێن پێكڤە، یان ھەڤالێن ئێكن یان ئێك خێزانن و ب تنێ كورسیكا وی نەبیت، ما دێ كی ل دووماھیا پاسێ روینیت و كەنگی ھەست ب ڤێ چەندێ كر، دگەل بلندبوونا دەنگێ دو كەسان ل تەنشت ئێك، وی دگۆت: ئەز دێ پارەی دەم و یێ دی دگۆت: نەخێر ئەز دێ پارەی دەم و ژبەركو كەس ل تەنشتا وی نینە، ھێشتا كەسێ پرسیارا پارێ كرییا گەھاندنێ ژێ نەكری، دەستێ خوە برە ناڤ بەرویكا خوە، لێ نەزانی بھایێ سویاربوونا پاسێ تا دگەھیتە سەنتەرێ بازاری دێ چەند بیت و ئەڤێ پارە وەردگرتن، ب تنێ ھزار دینارەك ژناڤ پارێن وی دەرئێخستن و ئەڤێن دی ڤەگەڕاندنە ناڤ بەرویكا خوەڤە.
ئەگەر ب ڤی شێوەی بەردەوامییێ بدەتە چوونا خوە، ھەتا نیڤرۆ ژی ئەڤ پاسە وی ناگەھینتە سەنتەرێ بازاری و ھەر چەند كۆلانان، چەند نەفەرەك دەستێ خوە ل بەر پاسێ راكەت، پاسە یا رادوەستیت و كەنگی ب ڤێ راوەستیانێ دزانیت، دەما ھندەك ژ كورسیكێن خوە رادبن و ھندەكێن دی ل جھێ وان د روینن و ھێشتا دۆر نە گەھشتییە دووماھی كورسی و كەسێ تاقەتا پاشییا پاسێ نینە لێ روینیت و نزا وی بۆچی ئەڤە كر!
ھەردو كەسان سەرێ خوە یێ گەھاندییە ئێك و پستە پستا وانە، ب تنێ ئەو نەبیت. خوە ئەڤێ پرسیارا وی ژی كری و بەرسڤا وی ب دلێ وی نەبووی، یێ دگەل كەسەكێ دی كەتییە سوحبەتێ. ھێشتا دگەل خوە د ڤێ دانوستاندنێدا بوو، دەنگێ زارۆكەكێ ساڤا سەر ژ ھەمی دەنگان و ژ ھەمی پستە پستان ستاند و ھەمی ل سەمتا دەنگی زڤڕین. دا گریا ڤی زارۆكی بێزاریێ بۆ كەسێ دروست نەكەت، ئەڤ ژنا ئەڤ زارۆكە ل بەر سینگا، شیرێ سینگا خوە دایێ و زارۆك مت كر.. لێ كەسەكێ نەڤیا ڤی دیمەنی ژخوە بكەت، ھەر چەندە دەرسۆكا خوە كێشا بوو سەر سینگا خوە، دا كەس چ نەبینیت، لێ چاڤێن ھیچ نێرەكێ د پاسێدا، د ئامادە نەبوون ڤی دیمەنی ژخوە بكەن و ژخوە زەلامێ سمبێل بۆقێ ل تەنشتا ڤێ ژنێ، ھەست ب چاڤێن برسی دكر و ڤەحەویان ڤێ نەدكەفت، وەكی ناعوورێ سەرێ خوە ژڤی ئالی د زڤڕاندە ئالییێ دی.
ئەڤە جارا ئێكێ بوو ل ترومبێلەكا گشتی سویار دبیت و ھەر چەندە تێرا كرییا تەكسیێ پارە د بەرویكێ دا ھەبوون و زێدەتر، لێ سویاربوونا وی د پاسەكا نەفەران دا و ژ سەرێ باژێری بچیتە دووماھیا باژێری، بیرا وی ل ھەرزەكارییا وی دئینا، چەندین جاران ئەڤە بۆ خوە دكرە كەسب و كار، جار ل پاسێن تاخا سویار دبوو، پارێ كریێ ددا و ھینگێ دھاتە خوار، تا ل جھێ لێ سویاربووی دگەل نەفەرێن دی ژ ترۆمبێلێ ب خوار كەفتبا و جار ژی ژ بازاری سیاردبوو و ل دووماھی وێستگەھا گەھشتنا پاسێ، دا ھێتە خوارێ و چەند جاران یا چێ بووی، ژبلی وی كەسەك د پاسێ دا نەمایە و ل ھاتنە خوارێ، یێ ل پاسەكا دی سویار بووی و یێ ھاتییە جھێ خوە ل نیڤا بازاری ڤە. راوەستیانا ڤێ جارێ یا پاسێ و سویاربوونا سێ كچێن گەنج، سەرنجا وی راكێشا. ب تنێ پاشییا پاسێ یا ڤالایە و چار كەس دشێن لێ ب روینن، ئێك ئەوە و جھێ ھەر سێكێن دی دێ ئەڤ ھەر سێ كچە بن! دەما كچەكێ ژوان گوتییێ «مام» دەستویرییە ل ڤێرە روینین؟ ئەو ھێشتا یێ دناڤ خەیال و خەونێن ھەرزەكارییا خوە دا بوو، خۆشترین سویاربوونێن وی كچەك ل بەر تەنشتا وی روینیت. لێ ھەر باش بوو، پەیڤا «مام» بیرا وی ل وی ئیناڤە و گازی ئەڤێ پارا وەردگریت كر. ڤێ جارێ وی ب خوە سێ ھزار دینار ژ بەرویكا خوە ئینانە دەرێ، گۆت كرییا ڤان ھەر سێ كچان گەھشت و بێژە شۆفێری ل ئێكەم ویستگەھا دگەھیتێ راوەستیت، ئەز دێ ژ پاسێ ھێمە خار.