شەش شاشی
سالح دۆسكی
شەپوشۆڕی
د ژیارا شەپوشۆڕیێ دا رێكوپێكی نەشازە، لەو وی ژی دڤیا وەكی هەمیا بیسەروبەر بژیت، لێ نەشیا،
نەچار بوو ل گوندەكی بگەڕیت وەكی وی بن، ئەڤ چل وچار ساله وهێشتا لێگەڕیانا وی یا بەردەوامە.
شەرم
هەر شێوەیەكێ بۆ خۆ ژێگرتی پێ بژیت دگۆتنێ «شەرم»ە.. جارەكێ پێ ل شەرما خۆ كر و وەك خۆ ژییا لێ ب ئاوروویێن نفەرتهەلگر یێن خەلكی ب رۆژانە دهاتە سزدان؛ لەو نەچار بوو وەكی هەمییا ژیانێ برێڤە ببیت. دەمێ رۆژەكێ ژێ پرسین تەمەنێ تە چەندە..؟ د بەرسڤا خۆدا گۆت: دگەل سالێن من ژیان ب رێڤەدبری یان بێ وان.
شۆپە
د خێزانەكا شەهراویدا ژیا، پشتی بووی مامۆستایێ گوندی، گوند هەمی توشی تێكچوونێن دەروونی بوو.
شەپۆر
دگری و پرچێ خۆ ڤەدچڕی و ل خۆ ددا، هەمی جیران ل هەوارێ چوون.
– ئەڤە تە خێرە حورمەت.. چ قەومییە؟
– وژدان مر..
ڤەگێڕێ سەرهاتیێ دیار نەكر ئەرێ مەبەستا وێ وژدانا مرۆڤان بوو یان ناڤێ مرۆڤەكێ بوو.
شەرتانێ
كارێ وی شەرتانێ بوو.. گوند ب گوند دگەڕیا.. شەرتانێ وی: هەڤالێن خۆ هەمییان بێژینگ بكن ئەگەر ئێك ژی ب سەركەت ئەڤە بۆ هەوە دو فلس.. و ئەگەر نە وەسای بوو تو دێ دەیە من، ئەز درێژ ناكەم، خەزینا كابرایی نوكە جهێ فلسا لێ نینە هندی تژییە.
شەش
شەش هیڤی ژ ژیانێ خواستن، پێنج بۆ بجهـ هاتن و ئێك ما… ل كەرێ عینادێ سویار بوو و هەر پێنج هیڤیێن بجهاتین گۆری یا شەشێ كرن و هەر ب جهـ نەهات.
