فالڤەکەر
نڤیسین: نزار قەبانی
وەرگێڕانا: حەسەن رێكانی
ڕوینشتە خوارێ و ترس د چاڤێن وێدا دیار بوون
هزرا خۆ د فنجانێ من یێ قلۆپاندیدا كر
گۆتە من: كوڕێ من، ب خەم نەكەڤە
كوڕێ من، حەزژێكرن یا ل سەر تە هاتییە نڤیسین
كوڕێ من، یێ خۆ گۆری خۆشتڤییێ خۆ دكەت شەهیدە
من باش بەرێ خۆ دایێ و ستێرناسی تێدا كر
لێ چ جاران من فنجانەكا وەكی یا تە نەخواندییە
لێ چ جاران من نەزانییە خەمەكا وەكی یا تە هەبیت
قەدەرا تەیە تو ژییێ خۆ هەمییێ د دەریایا حەزژێكرنێدا دەرباس بكەی
بێی كو ژێ بهێیە دەرێ
و ژیانا تە هەمی ببیتە پەرتووكەكا خەمان
قەدەرا تەیە د ناڤ ئاڤ و ئاگریدا بمینی زیندانی
سەرەڕای هەمی ئاگرێن وێ
سەرەڕای هەمی رابردوویێ وێ
سەرەڕای ئەو خەما ب شەڤ و ڕۆژان د ناڤ مەدا ئاكنجی
دێ حەزژێكرن هەر مینیت جوانترین قەدەر.. كوڕێ من
كوڕێ من، ژنەك یا د ژیانا تەدا هەی
و چاڤێن وێ مەزنی هەر بۆ چێكەرییە
دەڤێ وێ وەكی ئویشێ تری هاتییە نیگاركرن
كەنیا وێ ستران و گولن
و پرچا وێ وێ یا غەجەری و دین
ل جیهانێ هەمییێ گەشتەیێ دكەت
دبیت ببیتە ژنەك كو دلێ تە داخوازا وێ كر بیت
ئەوە هەمی دنیا
لێ ئەسمانێ تە یێ بارانییە
و ڕێكا تە یا گرتییە
كوڕێ من، خۆشتڤییا تە یا د ناڤ كۆچكەكا چاڤدێریكریدا نڤستییە
هەر كەسەكێ بچیتە دژۆرڤە
هەر كەسەكێ داخوازا وێ دكەت
هەر كەسەكێ نێزیكی دیوارێ باغچەیێ وێ دبیت
هەر كەسێ بزاڤێ دكەت كەزییا وێ ڤەكەت
دێ هێتە بەرزەكرن.. كوڕێ من
كوڕێ من، دێ ل هەمی جهان ل وێ گەڕی
دێ پرسیارا پێلێن دەریایێ كەی
و دێ پرسیارا فەیرووزێن ڕویباران كەی
دێ گەشتەیێن دەریایان كەی
دێ ڕۆندكێن تە وەكی دەریایێ هێنە خوارێ
دێ خەما تە مەزن بیت هەتا دبیتە دار
كوڕێ من، دێ ڕۆژەك هێت ب شكەستنا وژدانێڤە زڤڕی
پشتی ژ دەستدانا ژییێ خۆ دێ زانی
كو تە ل دویڤ هێلەكا دویكێلێ دكرە غار
خۆشتڤییا دلێ تە چ ئەرد یان وەلات یان ناڤونیشان نینن
كوڕێ من، چەند یا ب زەحمەتە تو حەز ژنەكەێ ب كەی و یا بێی ناڤونیشان بیت.
