گول نخوین
ڕۆژا مزووری
بایەک هات
ئەز دگەل خۆ هەژاندم
نە دارەک بووم
دا بەلگێن من ب وەرینیت
نە دەریایەک بووم
دا پێلێن من ب شلقینیت
نە زەڤییەک بووم
دا داڤێن من ب هەژینیت.
چیایەک بووم،
با و باڕۆڤەیان
شیانێن هەژاندنا من نەبوون
بیرەکا ئاڤ شرین بووم
هەمییان ژ تاما وێ حەزدکر
گول نخوینا نازک بووم..
نەنە!
دارەکا ڕهـ موکوم بووم،
دەریایەکا کویر و
زەڤییەکا خەملین بووم
تە زانی کا ئەز چ بووم؟
ئەز سروشتێ ڕەنگین بووم
تو هاتی
تە خەملا من هەمی تێکدا،
تە هەمی ڕەنگێن من تێکەلکرن و
ڕەنگەکێ نوی ژێ پەیداکر
من ڕەنگێ تە باش لبیرە،
من ب هەمی ڕەنگێن خۆڤە
ژ ڕەنگێ تە حەزدکر
ئەو ڕەنگ و دێم
یێ زارۆکێن بێ گونەهـبوو.
تو لبەر تەنشتا من دڕوونشتی
تە هۆزان ب خەملا من دگۆتن
تو نە بلبل بوویی
نە کەو بوویی،
بایەکێ هشک و ساڕبوویی.
من شییان هەبوون
تە ڕزگاربکەم..!
ئەیی گول نخوینا نازک
من ڕەنگێن تە هەمی گوهۆڕین
بۆ ئیک ڕەنگ،
ئەو ژی ڕەنگێ ئەڤینێ یە.
ڕەنگێ ئەڤینێ!
من نەدزانی ئەڤین ب کیژ ڕەنگییە،
بەلێ ئەز یا پشتڕاستبووم
ئەو ب ڕەنگەکێ پاقژبوو.
ئەڤین نە ب ئێک ڕەنگییە،
هەمی ڕەنگ تێکەلدبن
و ڕەنگێ ئەڤینێ پەیدادبیت.
• ئەڤینێ چەند ڕەنگ هەنە؟
• ڕەنگێ تە.
• ئەز چ ڕەنگم؟
• هەمی ڕەنگ.
• ئەز ئەڤینم؟
• بەلێ، تو ئەڤینی..
ئەڤینەکا تەمەن بری و بێ مراد.
من تو مەزنکریی،
ژ بایەکێ هشک و ساڕ
فێنککریی،
دناڤ کەزیێن خۆ دا
من بووتە پرەک دانا.
من سینگێ خۆ کرە زۆزانەک
و من گۆتە تە ژ کانیێن وێ ڤەخۆ.
ئەز دا بمە هەلبەستەکا نەمر
بۆ لێڤێن تە
دا بمە چار ڕەنگ و چار پارچە
بۆ مانا تە
دا بمە دایکەکا ژیی درێژ
بۆ گڕنژینا تە.
