ترسەک بێی خوەدی
گرین نازی عبدولباقی
دەنگێ گرییا بارانێ دهات!
ڕوویێ ئەسمانی گرژ دبوو
عەوران سەرێ خوە دهەژاند
چاڤێن وان تژی تۆز دبوون و
سەرێ خوە ژۆر دا شۆڕ دکر
بایی موزیکەک دژەنی!
نە گوهێن ئەسمانان جارەکێ دبهیستن
نە ژی جارەکێ بالندەیان
قەفەسێن خوە بۆ شکاندبوون
من دبهیست ژ وارێ خوە دوور دبوون
ل شوینا فڕینێ،
سەما دگەل پێلێن دەریایی دکرن
ڕۆژێ خوە د کاڤلدانکێ ترسێ دا ئاسێ دکر
نە شیان هەبوون سەرێ خوە بینیت دەر
نە ژی جارەکێ بهێلیت..
چپکەک وێ ل خوە ئاشق بکەت
تایێن داران بنگرتی بووبوون
تژی پێڤە پرتێن کنفێن وەرپێچایی بوون
زەمانی گازی دکر!
نە مرۆڤان جلکێن دوهی لبەر خوە کربوون
نە ژی کفنێ سبەهی ژ خوە کیڤی دکر
ڤێ گازییێ..
قورکا ترسێ تژی بێدەنگی دکر
ژ ئەسمانی ..
ژبلی مرییێن کفنڕەش
من چ کەسێن دی شک نەدبرن
ل ڤێ ئاوازێ خوە بکەن خوەدی
ل ڤی ئەردی ژی..
خوەدی کفنێن سپی!
ژ ڤی لایی بۆ لایێ دی
یێ شەرمێ بەلاڤ دکەن
شەرم..!
ژ بۆ ڕۆحێن مرییان بووبوو شەرابەک
هێدی هێدی پێ مەست دبوون
کەنییا گونەهێ ژ وێ ڤە دهات!
نە گرییا بارانێ ..
نە ژەنینا بایی..
نە ژی گازییا زەمانی..
نەشیان جلکێن ڤێ گونەهێ
ب ئاڤا دنیایێ ڤە بشوون!
