بەرماییکێن بێ دەنگ کری

قەهرەمان عەبدوللا بەرواری

پشتی چاڤ تاری بووین د شەڤێدا
رۆناهی د دێمێ پەنجەرێ ڕا
پەشی ناڤ ژۆرا من
هەروەکو بژۆرکەتنا داڤێن رۆژێ..
بۆ ناڤ لیوانکا کاڤلەکێ خرابکری

پشتی ل بەندەمانێ ..
گوڕیا ئاگرێ دلێ من ڤەمری،
گڕنژینەکا گیرۆ هەلات،
هەروەکو هەلگرتنا مۆمەکا سۆر
د ناڤ لاشێ خۆلییێ دا هلکری..

پشتی فێری بێدەنگییێ بوویم،
پەیڤ ل پەی پەیڤێ سەمایێ دکەن،
وەکو قەبینا کەوێ ل بەر دەرێ ڕکەها دلەکێ شکەستی و
پرت پرت کری

پشتی ئێک لدویڤ ئێک خەون کەتین ژێرگۆڕ،
ئەلند بشکوڕی،
هەروەکو تاڤەزەرک بوویە خازخازۆک
ل بەر دەرێ خانیەکێ ڤالەکری..

پشتی برینێ پالدای برینێ
تاڤیەکا بارانێ باری،
هەروەکو دەرمانەکێ گیرۆ
بۆ سەر برینا تافیلکرن ژبیرکری..

پشتی دەستێ وێ د دەستێ وی دا گەمری،
هەمبێزەک د گیانێ مندا غولغولی،
هەروەکو دەرمانەکێ ئکسپاییر
بۆ سەر دەرێ برینەکا دەڤ ڤەکری..

پشتی من دل بوویە پێت و خۆلی،
گول و گولدانک گڕنژین،
هەروەکو چاندنا گولێن سۆر
ل دەڤێ گۆڕستانەکا پەرژان کری..

پشتی ژ غاردانێ ماندیبوویم و ڕاکەتیم ئەردی،
ڕێک و ڕێبار ئاڤابوون،
هەروەکو گازیا زارۆکەکی
بۆ پیرەکێ ل سەر قانا پشتێ و
ب چاڤێن زل.. دکەت گری..

پشتی دێمێ من تیک – تیک بووی،
قۆدیک ب رێزکرین وەکو تابلۆیان،
هەروەکو یارێن کەڤنار
شکەستنا من ل بیر من دئینن،
ئەوا من ژبیر کری..

پشتی خەریببوون هاتیە بن گوڕکرن،
دەنگێ وێ یێ نازک هات،
هەروەکو بایەکێ دێم تویری،
دڤێت گۆڕان ب هەلکۆلیت،
ڕاکەتن ئەوێ ئاخا لسەر سینگێ من کۆم کری.

کۆمێنتا تە