پازدە مایکرۆچیڕۆک

شەمال ئاکرەیی

(1) شەمال
با: دێ تە ڤەمرینم.
شەمال: ئەز دزانم، بەلێ هەتا دووماهیێ ژی دێ هەر رۆناهیێ دەم، بەلێ ما نە تو ب ڤی کاری دێ تاریێ بەلاڤ کەی؟

(2) ڤەدەربوون
پەڕ: ئەز هەمبەر تە یێ لاوازم و تو ب ساناهی من ددەیە بەر پێلێن خۆ!
با: باوەڕ بکە، ئەز نەشێم وە بکەم ئەگەر تو خۆ ژ رەهێن خۆ ڤەدەر نەکەی!

(3) سیبەر و ڕۆناهی
سیبەر: تو هزر دکەی کو ئەز نەشێم رزگار ببم، هەر چەندە ئەز د دلێ تە دا دژیم.
ڕۆناهی: تو مینا شەڤێی، دنێڤبەرا گاڤێن تاڕیێ دا دهێی و دچێ و ژ من دگەڕی.

(4) ویژدان
– ئەو کییە د ناخی من دا د ئاخڤیت؟
– ئەزم.
– تو کی؟
– تو… بەری دەرەوان بکەی!

(5) با و ئەڤر
با: تو هەر تم ژ ئاسۆیان دڕەڤی، کا بێژە من، تو بۆ کووڤە دچی؟
ئەڤر: ئەز ژ ئەردەکی دگەڕێم، داکو سترانان بۆ ببێژم، نێ ئەز یێ تژی مە ژ پەیڤێن هێشتا نەهاتینە گۆتن.

(6) كولیلک و باهۆز
کولیلک: تو نەشێی من ژ ناڤ ببەی.
باهۆز: ئەز دکارم تە ل گەل ئەردی راست بکەم!
کولیک: دێ چ ل تۆڤێ من کەی؟

(7) دەرگەهێ گرتی
– چما دەرگەهی نا قوتی؟
– چونکی ئەز نزانم چ ل پشت هەیە.
– ئەگەر تە دەرگەهـ ب گرتی هێلا، دێ زانی؟
– نەخیر، بەلێ دێ یێ ب تەناهی بم.
– ئەرێ ما راستی ژ تەناهیێ گرنگتر نینە؟

(8) دل و عەقل
دل: گەلەک هزران نەکە، ئەزم سەرکێشیێ دکەم.
عەقل: لێ ئەز بنیاتێ هەر تشتی مە، ئەگەر هزران نەکەم، ناژیم.

(9) دەمی بەرزەبووی
– من سالێن درێژ یێن ژیێ خۆ ب هەر هۆ بەرزەکرن.
– تە بژاردە هەبوون؟
– ئەرێ، لێ ئەز دترسێ دا بووم.
– تە ئەو سال بەرزەنەکرینە… تە یێن کرینە بەهایێ نەوێرەکییا خۆ!

(10) ئەلند و تاری
ئەلند: ئەز رۆناهییا هیڤیێ مە پشتی تاریێ.
تاری: ئەز د بێدەنگییا تە دا دژیم، تو پێشوازییا من ناکەی و روی یێ خۆ دکەیە من.

(11) خەون و دۆرهێل
خەون: تو د من دا دژی، بەلێ ئەز نە یا تە مە.
دۆرهێل: ئەز ئەوم کو پشتی ژ خەوێ هشیار دبی بۆ تە دمینم .

(12) رووبار و چیا
رووبار: من چ توخیب نینە.
چیا: ئەز ژی خۆراگرم، تو چ جاران نەشێی من ل گەل خۆ ببەی.

(13) هیڤی و ئاشۆپ
هیڤی: تو نەشێی بێی من بژی.
ئاشۆپ: راستە، ئەز پێدڤی ب تە مە، نێ تو وە دکەی داکو درەوا ل گەل خۆ بکەم .

(14) زیندان
– ئەز زیندانیێ عەقلی خۆ مە.
– بزاڤێ بکە ژێ دەربکەڤە.
– ئانکو ژێ برەڤم؟
– هزرا دەرڤەی زیندانێ بکە، ژێ نەڕەڤە

(15) پرسیارکرن
– دەمەکێ پتر ب دە من.
– دەم ناهێتە دان، بەلکو دهێتە بکارئینان.
– کەنگی دێ ب دووماهی هێت؟
– دەما ژ پرسیارکرنێ رادوەستی.

کۆمێنتا تە