دلێ من
سەیفوللا محەمەد
سەد جار گۆری تەبت دلبەر دلێ من
دەما تە ژی دل كر هەمبەر دلێ من
مە دل دان هەڤ پەیدا كرن عەشق و ڤین
عەشقێ ڤەگرت هەمی ڕوبەر دلێ من
ژ چاڤان تە سەد تیر بەردان دلێ من
لەو بوو ماكا ژان و دەردان دلێ من
تە د خوەست كو باج و بێشان دل بدت
باج و بێش دان وەكو مەردان دلێ من
دلبەر كـەتی داڤا ڤینا دلێ من
بووی زینا خوین شرینا دلێ من
د عەشقێدا بوومە مەم ئەز دل ب خەم
خەما هشك كر ل من خوینا دل من
بزانە گەر گوهـ دی دەنگێ دلێ من
قەت نابینی دل ب ڕەنگێ دلێ من
تێكدا بوویە ئێش و ژان ئەڤ حالێ من
من گۆت: قەی حال هەتا كەنگێ دلێ من؟
