دەمێ پلان بـۆ ئـارمـانجێ هەبیت سـەركـەفتن مسۆگـەرە
ئيحسان ئـامێدی
سەرۆك بارزانی دبێژیت: پاشەروژ ئۆمێدە، ئیرادەیە، بەرچاڤ ڕوونییە، پلانە.
ئەڤە گۆتنا سەرۆكێ حەكیم و سیاسەتمەدار هزرمەند و دووربینە، و هۆسا سیاسەت دهێتەكرن و دەولەت پێ دهێتە برێڤەبرن و سەركەفتن دهێتە تۆماركرن.
دەمێ ئارمانج یا زەلال بیت و ب هیڤی و ئومێد بوو و ئیرادە و باوەری یا بهێزبیت و بەرچاڤ رۆنی هەبیت و پلانان بنەجه بیت و كار بۆ بهێتەكرن سەركەفتن دێ مسۆگەربیت.
پارتی هەر ژ دامەزراندنا خۆ ل سەردەستێ بارزانیێ نەمر ئارمانجا خۆ ب زەلالی دیاركریە و د پەیمانا مللی و د پرۆگرامێ خۆ دا راگەهاندی یە و نەخشەرێكا گەهشتن بۆ ئارمانجێ دانایە و ب باوەری و دلسۆزی خەبات بۆ كریە تا گەهشتیە ڤێ قۆناغێ یا هەرێما كوردستانێ كریە، هەرێمەكا فیدرالی د دەولەتا ئیراقا دیموكراتیا فیدرالیا دەستووری دا.
پارتی بۆ هەر ئارمانجەكا خۆ یێن دویر و یێن نێزیك، ب پلان و چاڤ رۆنی و ب هیڤی و ئومێد و ب ئیرادە و باوەری كاردكەت و سەركەفتنی دئینیت.
هۆسا بۆ هەلبژارتنێن گەڕا شەشی یا هەلبژارتنێن پەرلەمانێ ئیراقێ، پارتی پلان دانا و كار پێكر و شیا سەركەفتنێ تۆماركەت، ئەو ژی ب دەستڤەئینانا پتر ژ ئێك ملیۆن دەنگان، و ب ڤی سەركەفتنێ پارتی شییا ژمارەیا پیڤای بشكێنیت و سەركەفتنەكا مەزن تۆماركەت و ببیتە حزبا ئێكێ ل سەر ئاستێ كوردستانێ و ئیراقێ. ئەڤ سەركەفتنا پارتی دێ كوردستانێ بهێزئێخیت و دەستهەلاتا بهێتە پێكئینان ملكەچ بكەت دەستووری بجهبینیت و رێكەفتنێن پێكئینانا حوكمەتێ جێبەجێ بكەت و پێگیریێ ب پرەنسیبێن وەكهەڤیێ و هەڤسەنگیێ و لهەڤكرنێ بكەت.
هەلبەت پتر ژ ئێك ملیۆن دەنگێن پارتی د هەلبژارتنان دا بدەستڤەئیناین، رەهەندێن خۆ یێن حزبی و نەتەوەیی و سیاسی و جڤاكی و مێژوویی هەنە، ئەڤە دەنگێن پارتی و بارزانینە، ژ رێكخستنێن پارتی و هەڤڕكیێن رێبازا بارزانی، دەنگێن نەتەوەیا كوردستانێنە، هەر كوردستانیەكێ كوردپەروەر دزانیت پارتی و سەرۆك بارزانی نوونەراتیا گەلێ كوردستانی و دۆزا وێ یا رەوا دكەن، دەنگێن خەباتا سیاسیا پارتی دیموكراتی كوردستانێ یە، ئەو حزبا ئەڤە پتر ژ حەفتێ و نەه سالانە خەباتێ و شۆرەشێ ل پێناڤی ماف و ئارمانجێن مللەتی دكەت، دەنگێن جڤاكا كوردستانێ ب هەمی پێكهاتێن وێ ڤە یێن كو دزانن دەولەت سەرێ پارتی و سەرۆك بارزانی پێكڤەژیانا ئاشتیانە و ئارامی هەیە، دەنگێن مێژوویا خەبات رزگایخوازیا كوردستانێ یە، ئەوا پارتی پتریا بەرپەڕێن وێ تۆماركرین، دەنگێن شەهید و قوربانیانە، كو پارتی خۆدانا مەزنترین تۆمارا شەهیدانە، ئەڤان توخمان هەمیان وەكریە كو بۆ دەنگدەران پێگیریەكا نەتەوەیی و سیاسی و جڤاكی و ئەخلاقی بەرانبەر پارتی چێبیت و ب هەست ب بەرپرسیاریا خۆ بكەن و ب ئەركێ خۆ راببن و دەنگی ب پارتی بدەن، و پارتی بهێز و سەرفەرازكەن دا كوردستان ب هێز و ئارام بیت.
مللەتی دلسۆزیا خۆ بۆ پارتی و بارزانی دیاركر و یا خۆ گۆت و كر ئەڤە شانازیەكا مەزنە و جهێ رێز و سوپاسیێ یە و یا دیتر ژی بەرپرسیاریا لایەنێن سەركەفتی و جهێن پەیوەندیدارە، هیڤیدارین ئیراقی دانە سەر رێكا وی یا دروست و دەستووری بجهبینن.
خۆیایە یاسایا هەلبژارتنان یاسایەكا نەدادپەروەرانەیە، ژبەركو مافێن دەنگدەری پێشیل دكەت و ئەگەر مافێن دەنگدەری د دابینكری بن، دڤێت كورسیێن پەرلەمانی ل دویڤ ژمارەیا دەنگان بیت و ل وی دەمی لیستا پتریا دەنگان ئینایین دێ پتریا كورسیكێن پەرلەمانی بدەستڤە ئینیت و دێ بیتە هێزا سەرەكی ل ئاستێ ئیراقێ و دێ باندۆرەكا مەزن ل سەر پێكئینانا حوكمەتێ و بجهئینانا دەستووری هەبیت.
هونەرە ئەڤ ژمارەیا مەزنا دەنگان پارتی بدەستڤەئینان، د دەمەكی دا كو پارتی و هەرێما كوردستانێ ئێخستیە بەر توندترین گڤاشتنێن سیاسی و ئابۆری و میدیایی و ئاسایشێ، زێدەباری برینا بودجەی و نەدانا مووچەی ب مەرەما لاوازكرنا هەرێمێ و دویركرنا جەماوەری ژ پارتی، بەلێ حوكمەتا پارتی بەردەوام بوو ل سەر پێشكێشكرنا خزمەتگوزاریا و ئاڤەدانیێ و ئارامیێ و نەهێلا پیلانێن نەیار و نەحەزان سەربگرن بۆ لاوازكرنا قەوارەیێ هەرێمێ و دویركرنا خەلكی ژ پارتی و ئەنجامێن هەلبژارتنان ئەو نیشا دا پارتی ژ وان هەمی پیلان و گڤاشتنان ب هێزتر و مەزنترە و ژ هەمی حزبان ل ئیراقێ مەزنترە.
پشتی رۆخاندنا دكتاتۆریەتێ و چەندین گەڕێن هەلبژارتنان چەندین سەربۆڕێن حوكمرانیێ ل ئیراقا نوی هاتنە هاژۆتن، ب مخابنی ڤە لایەنێن بالا دەست ل بەغدا هەول دا ئیراقێ بەر ب تاكرەویێ و دكتاتۆریەتێ و مەركەزیەتێ ڤە ببەن، بەلێ شكەستن ئینا، ئەڤجا نهۆ دەمێ دانانا ئیراقێ یە ل سەر رێكا وێ یا دروست، ئیراقا دیموكراتیا فیدرالیا دەستووری و دەستووری بجه بینن، لدویڤ بنەمایێن هەڤپشكیێ و هەڤسەنگیێ و لهەڤكرنێ، ژبوونا وەلاتەكێ ئارام و جڤاكەكا بەختەوەر، كو تێدا هەموو پیكهاتێن جڤاكی یێن ئیراقێ ب تاك و كۆم ڤە ب مافێن خۆ شاد و سەرفراز بن.
