سترانا (من تۆ دڤێی) دێ بیتە دەرگەهەك كو یا بەردەوامبم
هیڤی كەریم:
سترانبێژ (هنین كەمال) د دیدارەكێ دا بۆ رۆژنامەیا ئەڤرۆ گۆت: دژیەكێ بچووكدا من حەزا سترانگۆتنێ هەبوو، لەورا پشتی دەلیڤە هاتی ئەز چوومە پەیمانگەها هونەرێن جوان ژبۆ هندێ داكو ب شێوەیەكێ ئەكادیمی فێری سترانگۆتنێ ببم.
هەروەسا گۆت: ل دەستپێكا پەیمانگەهێ من پشكداری د هژمارەكا فەستیڤال و چالاكیێن پەیمانگەهێ دا كریە و وەك كۆرس پشكداری د گۆتنا چەندین سترانان دا كریە، هەروەسا بۆ قوتابخانەیان ژی من چەند كارێن هونەری ئەنجام داینە، وەك پەیڤ و ئاواز و گۆتن، سوپاس بۆ خودێ ئەز نوكە یا گەهشتیمە ئاستەكێ باش و دئەڤ سالەدا ئێكەم بەرهەمێ من ب شێوێ دویت بەلاڤ بوو، كو ئەو ژی سترانەك بوو ب ناڤێ (من تۆ دڤێی) ل گەل سترانبێژ (رێدار نسرەت) بوو، پەیڤ ژی یێن (نسرەت هادی) بوون و ئەڤ سترانە دێ بۆ من بیتە دەرگەهەك كو یا بەردەوامبم و سوپاسیا خێزان و ماموستا و هەموو هەڤالێن خوە دكەم كو بەردەوام پشتەڤانیا من دكەن.
